Европската унија се подготвува за ново заострување на трговските односи со САД, по најавите и заканите од Доналд Трамп за зголемување на царините за европските автомобили, што повторно ги раздвижи трансатлантските тензии.
Според анализата на порталот Политико, ваквите потези го туркаат веќе чувствителниот трговски договор меѓу ЕУ и САД кон нова фаза на неизвесност. Во среда се очекува состанок меѓу Европскиот парламент, земјите членки и Европската комисија за усогласување на ставовите, но во Брисел постојат длабоки разлики околу пристапот.
Договорот, кој претходно беше постигнат во Шкотска, одамна предизвикува несогласувања во Унијата. Додека дел од земјите, особено Германија, инсистираат на негово спроведување, дел од европратениците изразуваат сомнеж и предупредуваат на нестабилност во односите со Вашингтон.
Новите најави за можни 25 % царини на автомобили дополнително ја зајакнуваат критиката дека договорот не нуди доволна сигурност, поради што се бараат дополнителни заштитни механизми или негово замрзнување.
Во меѓувреме, разговорите меѓу европскиот комесар за трговија Марош Шефчович и американскиот трговски претставник не донеле конкретен напредок, а според дипломатски извори, американската страна не се повлекува од своите позиции.
Напнатоста се надоврзува и на други политички сигнали од Вашингтон, меѓу кои и најавите за можно повлекување на американски трупи од Германија, што во Брисел се толкува како дополнителен притисок врз ЕУ.
Претседателката на Европската комисија, Урсула фон дер Лајен, порача дека Унијата останува посветена на договореното, но очекува и САД да ги почитуваат преземените обврски.
Во Европскиот парламент ставовите остануваат поделени – едни инсистираат на брза имплементација за да се избегне економска нестабилност, додека други предупредуваат дека избрзани чекори би можеле да ја ослабат позицијата на Европа.
Аналитичарите оценуваат дека ситуацијата надминува чисто економска димензија и прераснува во тест за довербата меѓу ЕУ и САД, која сè повеќе се доведува во прашање.
