Министерот за надворешни работи и надворешна трговија Тимчо Муцунски соопшти дека Европска комисија ставила на располагање 65,7 милиони евра за Македонија во рамки на Инструментот за реформи и раст.
Според Муцунски, станува збор за највисок износ во регионот, во споредба со 49 милиони евра за Албанија и 44,2 милиони евра за Црна Гора.
Тој оцени дека ова претставува потврда за посветеноста на Владата кон реформите, исполнувањето на обврските од Планот за раст и имплементацијата на европските стандарди.
Согласно информацијата од Европската комисија, средствата се одобрени по позитивната оценка за спроведените реформски чекори, а реформите се однесуваат на образованието и дигитализацијата.
Од вкупниот износ, 30,6 милиони евра ќе бидат префрлени директно во државниот буџет, додека останатите средства ќе бидат наменети за инвестициски проекти преку Инвестициска рамка за Западен Балкан.
