Филипче: Државата е нашиот дом, борбата за иднината е заедничка обврска

Лидерот на СДСМ, д-р Венко Филипче, во видео обраќање по повод Денот на независноста – 8 Септември, порача дека државата е дом на сите граѓани и борбата за нејзината иднина е заедничка обврска.

— реклама —

Филипче нагласи дека државата не е ничија сопственост, туку припаѓа на граѓаните. „Државата е на граѓаните. Таа е нашиот дом. За нашиот дом мора да се бориме сите. Македонија е и на тие што останаа овде, и на тие што заминаа, ама не заборавија. Мораме да ја чуваме оваа држава, затоа што немаме друга“, истакна тој.

— реклама —

Тој повика на политичко и државничко освестување, оценувајќи дека патриотизам е да се обезбеди чист воздух, да се помагаат послабите и посиромашните и да се гради правична држава. „Државата не се брани само со знаме и химна, се брани и со фер институции, и со праведно судство, и со еднакви шанси за сите. Денес заканата не е од оружје, туку од корупцијата, неправдата, дискриминацијата и сиромаштијата“, рече Филипче.

— реклама —

Претседателот на СДСМ потсети дека партијата во изминатите 34 години учествувала во сите клучни државни одлуки, со кои, како што рече, е зачувана државата од војна, изградени институциите, зголемени платите и социјалната помош, обезбедено членство во НАТО и справување со кризите.

„Сега е време да се обезбеди иднина што нема да зависи од тоа кој е на власт, туку каква држава сме изградиле. Ако 1991 се изборивме за независност, сега треба да се избориме за иднина. Честит нека ни е Денот на независноста, да ни е силна државата, да ни е чесна борбата“, порача Филипче.