Филипче: Шилегов работи во корист на ВМРО-ДПМНЕ и ја дели партијата

Претседателот на СДСМ, Венко Филипче, изјави дека поранешниот градоначалник на Скопје, Петре Шилегов, работи во корист на ВМРО-ДПМНЕ и придонесува за внатрешни поделби во партијата.

— реклама —

Одговарајќи на новинарско прашање, Филипче посочи дека не станува збор за различно мислење, туку за, како што рече, координирано дејствување.

— реклама —

„Овде не станува збор за туѓо мислење, затоа што и тоа мислење беше сослушано. Станува збор за процесно одработување за ВМРО-ДПМНЕ и за внатрешна поделба на партијата. По сите проверки на информациите, дојдовме до тој заклучок. Извршниот одбор ја донесе одлуката со консензус, никој не гласаше против“, изјави Филипче.

Тој нагласи дека зачувувањето на единството во СДСМ е клучно во, како што рече, борбата против корупцијата и криминалот, за кои ја обвини актуелната власт.

— реклама —

„Нема да дозволам понатамошни поделби во СДСМ, особено во услови кога се соочуваме со криминална и корумпирана власт. Падот на рејтингот на ВМРО-ДПМНЕ е евидентен, додека ние бележиме раст. Единственото што можат да го направат е да се обидат да ја делат партијата одвнатре. Тоа нема да го дозволиме“, рече Филипче.

— реклама —

Според него, обидите за, како што ги оцени, внатрешни раздорни процеси преку поединци, се насочени кон ослабување на СДСМ, но, како што потенцираше, партијата ќе остане обединета.