Филипче од Босилово: Нема да дозволиме отворање на рудникот Иловица – Штука

Претседателот на СДСМ, Венко Филипче, на средба со граѓаните во општина Босилово порача дека нема да дозволат отворање на рудникот Иловица – Штука, обвинувајќи ја актуелната власт дека подготвува терен за реализација на проектот.

На средбата присуствуваа и пратениците Јована Тренчевска, Борче Цветков и Миле Цеков, како и граѓански активисти, претставници на невладини организации и жители на општината.

— реклама —

Филипче истакна дека собирот не бил партиски, туку средба на граѓани загрижени за најавите за отворање на рудникот, без оглед на нивната политичка определба.

„Граѓаните се исплашени од најавите дека овде ќе се отвори рудник. Оваа власт покажува сериозни намери проектот да се реализира“, изјави Филипче.

— реклама —

Тој посочи дека во предложениот нов просторен план за територијата на државата се предвидуваат локации за рудници, оценувајќи дека нивното вклучување претставува важен чекор во процесот што може да доведе до отворање рудници. Според него, ваквите планови бараат сериозна реакција и активно вклучување на граѓаните во јавните дебати.

— реклама —

Филипче ја обвини Владата предводена од Христијан Мицкоски дека, како што рече, во услови на финансиски притисоци се обидува да ја распродава македонската земја за бизнис-интереси. Овие обвинувања ги упати во контекст на противењето на проектот Иловица – Штука.

Тој најави дека ќе се спротивстават на сите формални постапки што би можеле да овозможат реализација на проектот, и преку институционално дејствување и со аргументи во јавните расправи.

„Нема да дозволиме оваа власт да ја распродава македонската земја за сопствени бизнис-интереси. Рудник овде нема да има. Ќе бидеме експлицитно против, а доколку е потребно, ќе формираме и жив ѕид“, порача Филипче.

Со оваа порака, тој повторно го истакна противењето на СДСМ кон отворањето на рудникот Иловица – Штука, повикувајќи на заштита на интересите на локалното население и активно учество на граѓаните во процесите на одлучување