Филипче со порака за 8 Септември: Нашите предци се бореа за држава, наша обврска е нашите деца да сакаат да живеат во неа

Претседателот на СДСМ, Венко Филипче, по повод 8 Септември – Денот на независноста, порача дека македонската државност е создавана низ генерации и дека денешната генерација има обврска да продолжи со нејзиното градење.

„Денес одбележуваме 35 години од историската одлука на македонските граѓани за независна, суверена и демократска држава“, напиша Филипче.

Тој во својата објава потсети на историскиот континуитет на македонската државност – од Илинден, преку одлуките на АСНОМ, до референдумот од 8 Септември 1991 година.

— реклама —

Филипче оцени дека секоја генерација имала своја историска улога. Според него, илинденската генерација ги поставила темелите на борбата за слобода, АСНОМската генерација ја втемелила македонската државност, додека генерацијата од 1991 година се изборила за независна држава и започнала борба за нејзино меѓународно признавање.

Тој ги спомена и генерациите што следувале, кои, како што наведе, решавале тешки спорови и ги оствариле клучните стратешки цели, меѓу кои членството на Македонија во НАТО и отворањето на патот кон Европската Унија.

„СДСМ е дел од тој државотворен континуитет – активен учесник во создавањето и развојот на современата македонска држава, во борбата за независност по мирен пат, меѓународното признавање, членството во НАТО и европската интеграција“, напиша лидерот на СДСМ.

— реклама —

Филипче порача дека на 35-годишнината од независноста фокусот треба да биде насочен кон иднината и кон создавање услови младите да останат во земјата и својата иднина да ја гледаат дома.

„Нашите предци се бореа да имаме своја држава. Оваа наша генерација има обврска да се избори нашите деца да сакаат да живеат во неа, да се избори за Европска Македонија“, порача тој.

— реклама —

Според Филипче, државата не е само институционален систем, туку и секојдневниот живот на граѓаните, економските можности, достоинствената работа и условите за младите да создаваат семејства.

Тој повика на градење „економски силна, европска држава“, со подобар животен стандард, функционален систем и правда која ќе важи еднакво за сите.

„Да изградиме европска Македонија во која младите ќе можат да создадат дом и семејство, да имаат достоинствена работа, да успеваат со знаење и труд и да имаат европски можности дома“, порача Филипче.

— реклама —

На крајот, тој ја опиша изградбата на европска Македонија како генерациска задача.

„Тоа е нашата генерациска задача. Да ја продолжиме македонската државотворна линија – со заедништво, со достоинство, и со јасна визија за иднината во Европа“, напиша Филипче.

„Затоа што Македонија е сè што имаме. Нека ни е честит и вековит 8 Септември – Денот на независноста!“, порача лидерот на СДСМ.