Премиерот Христијан Мицкоски во својот говор по повод 35-годишнината од независноста на Македонија се осврна на политичките поделби во земјата, критиките кон Владата и потребата од дијалог, но порача дека за прашањата поврзани со идентитетот, јазикот и културата нема компромис.
Мицкоски оцени дека 35 години по независноста постои потреба од искрено соочување со слабостите на општеството, но и остро ги критикуваше, како што ги нарече, политичките елити кои произведуваат безнадежност, очај и поделби.
„Тие се фабрика за произведување безнадежност и очај. Омраза која го труе општеството. Таквата губитничка политика треба да нè повлече сите надоле. Секој млад човек да почне да се колеба. Да не прикажат дека сме исти кога сме толку многу различни. Но таквите поединци не се достојни за времето во кое живеат и за улогата која се борат. Тие се тегот кој влече надолу и сето ова е резултат на тоа што тие сакаат власт поради пари и моќ, не поради идеја и концепт, рече Мицкоски, додавајќи дека, според него, постојат политички сили кои се противат на проектите и политиките што водат кон развој.
Премиерот ги наведе изградбата на болници и патишта, новиот клинички центар, инфраструктурните проекти, брзата железница, зголемувањето на платите и пензиите, дата-центрите и новите инвестиции како дел од работите за кои, како што оцени, Владата се соочува со критики.
Во тој контекст се осврна и на набавката на нов владин авион, дека не го земаат предвид фактот дека леталото би можело да се користи и за медицински евакуации.
„На крајот, кога ќе заврши сето ова, ниту дата центрите, ниту болниците, ниту училиштата по општините, ниту авионот, ќе го земам со себе. Тоа останува на граѓаните, на државата, на народот“, порача Мицкоски.
И покрај острите критики, премиерот порача дека Владата ќе продолжи да нуди дијалог и да гради мостови, нагласувајќи дека политиката треба да биде вештина на разговорот, а не на поларизацијата и блокадите.
„Ќе продолжиме да градиме мостови. Ќе подаваме рака за прашања важни за нашата иднина и нема да се откажеме од тоа да понудиме дијалог“, рече Мицкоски.
Сепак, тој нагласи дека постојат прашања за кои, како што рече, нема компромис и договори „под маса“, особено кога станува збор за идентитетот, постоењето, јазикот и културата.
„Нема играње за она што значи наш идентитет. Наше постоење. Наш јазик и култура. Компромисот за овие прашања значи рушење на македонскиот основ и Илинден“, порача премиерот.
Мицкоски говорот го заврши со порака дека зборот и честа мора да останат најсилната брана на државата.
„Нашиот збор е најсилната брана, а со зборот нема играње. Тогаш се играте со честа. А кога ќе ја изгубите честа, тогаш ништо друго не ви е потребно во животот“, рече Мицкоски.
