Фон дер Лајен од 30 септември до 2 октомври на турнеја низ Западен Балкан, ќе дојде и во Скопје

Претседателката на Европската комисија, Урсула фон дер Лајен, од 30 септември до 2 октомври ќе престојува во земјите од Западен Балкан, при што меѓу четирите станици на нејзината регионална турнеја ќе биде и Скопје.

Покрај Скопје, Фон дер Лајен ќе ги посети Тирана, Приштина и Подгорица, каде што ќе разговара со шефовите на државите и владите, а ќе посети и проекти финансирани од Европската Унија.

— реклама —

Во фокусот на разговорите со лидерите од регионот ќе бидат европскиот пат, постепената интеграција и спроведувањето на Планот за раст за Западен Балкан.

„Како што изјави претседателката на Самитот ЕУ-Западен Балкан овој јуни, нашата Унија нема да биде целосна без Западен Балкан. Затоа, во своите разговори, таа ќе се фокусира на претстојните чекори на европскиот пат на нашите партнери и на тековниот напредок во постепената интеграција, поддржана од нашиот План за раст за Западен Балкан“, изјави портпаролката на Европската комисија, Ариана Подеста.

— реклама —

Србија и Босна и Херцеговина не се опфатени со оваа посета поради изборите во двете земји, но од Брисел најавуваат дека Фон дер Лајен ќе ги посети во наредниот период.

Во пресрет на посетата на претседателката на Европската комисија, европратеникот и поранешен известувач за Македонија во Европскиот парламент, Илхан Ќучук, оцени дека односите меѓу Софија и Скопје стануваат „сè потешки и сè полоши“. Во интервју за бугарски медиум тој порача дека за продолжување на европскиот пат е потребен консензус меѓу главните политички партии во Македонија.

„Ако идејата е да се оди во Европската Унија, двете главни политички партии мора да се договорат за ова прашање и да го пронајдат овој јавен, политички, општествен консензус во нивната земја“, изјави Ќучук.

— реклама —

Во меѓувреме, заменик-министерот за надворешни работи Зоран Димитровски учествуваше на форумот „Европа се среќава со Балканот“ во Софија, каде што се обрати на македонски и бугарски јазик и ги демантираше шпекулациите дека постои владина инструкција македонските политичари во Бугарија да зборуваат на англиски.

Димитровски порача дека Македонија нема проблем Бугарите да станат дел од Уставот и дека е подготвен акциски план за заштита на помалите етнички заедници, меѓу кои и бугарската заедница.

„Но, очекуваме исто така од нашиот сосед да ги имплементира пресудите на Судот за човекови права во Стразбур и да ги регистрира граѓанските здруженија на Македонците“, изјави Димитровски.

Претходно, еврокомесарката за проширување Марта Кос во интервју за бугарски медиум порача дека македонската влада треба да го исполни договореното, додека од Бугарија очекува поддршка за продолжување на процесот откако Македонија ќе ги исполни уставните измени.