Откако споменикот „Македониум“ во Крушево бил отстапен за околу 500 евра за снимање видеоспот на косовскиот рапер Дон Џони, случајот предизвика реакции и иронични коментари на социјалните мрежи. Еден граѓанин сега бара да го изнајми споменикот за роденден – „под исти услови како на раперот“.
„Им пишав мејл на Музеј Крушево да ми го дадат Македониум да славам роденден под исти услови како на раперот за 500 евра. Што мислите, ќе ми одговорат?“, напиша Александар на социјалните мрежи, објавувајќи и фотографија од пораката што ја испратил.
Во барањето до музејот, тој иронично се повикува токму на условите под кои просторот бил отстапен за снимањето на спотот.
„Почитувани, поттикнат од спотот што сте дозволиле да се снима во Македониум за цена од 500 евра, ве молам, сакам да го изнајмам истиот споменик, Македониум, под исти услови што сте му ги дале на косовскиот рапер. Се надевам на брз одговор затоа што ми се ближи роденденот. Ви благодарам и ви следува парче торта“, стои во пораката што ја објави.
Реакцијата следува откако беше објавено дека споменикот „Македониум“ бил отстапен за снимањето на спотот „Секси мама“ на косовскиот рапер Дон Џони.
Според информациите, продукцијата побарала дозвола од Историскиот музеј Крушево, а музејот го одобрил користењето на просторот. Директорот Миха Оџаклиески изјавил дека Управниот одбор има донесено одлука просторот да може да се отстапува за снимања со соодветен надомест.
Од друга страна, директорката на Управата за заштита на културното наследство, Весела Честоева, изјавила дека од Управата не била побарана дозвола за снимањето во споменикот.
Според неа, до Управата пристигнуваат барања за снимање емисии и спотови во објекти што претставуваат заштитено културно наследство, а дозволи се издаваат доколку снимањето е во согласност со промоцијата на македонската култура, уметност и наследство.
Споменичкиот комплекс „Македониум“ е дело на Јордан и Искра Грабулоски и е отворен на 2 август 1974 година.
Објектот е едно од најпрепознатливите дела на македонската модернистичка архитектура и во повеќе наврати бил вбројуван во избори на светски архитектонски списанија.
