(Фото) „Во оваа држава само градежна маркица има вредност“: Многуфина со фотографии од отпадот кај Скопскиот аквадукт

Критичарката која пишува под псевдонимот Ина Многуфина објави фотографии од Скопскиот аквадукт, споредувајќи го изгледот на локалитетот од минатото со неговата денешна состојба, каде на фотографиите се гледаат купишта отпад во непосредна близина на споменикот.

„И додека сите се згрозуваме за Македониумот, видете го Аквадуктот пред 100 години и сега. Скопскиот аквадукт е официјално заштитено културно наследство со највисок степен на заштита како споменик од особено значење. Така да ве молам да не се правиме многу патриоти, во оваа држава само градежна маркица има вредност!“, напиша Многуфина.

— реклама —

Скопскиот аквадукт од 20 април 2021 година е прогласен за културно наследство од особено значење, во поткатегоријата „исклучително значење“, со што има највисок степен на заштита. Конзерваторскиот центар – Скопје го опишува како еден од последните аквадукти на Балканот сочувани во целина.

Проблемот со отпадот околу Аквадуктот не е нов. Во мај 2025 година токму на оваа локација започна акцијата „Генералка викенд“, при што и локалните власти зборуваа за долгогодишната негрижа за просторот.

— реклама —

Во истражување објавено во февруари 2025 година беше наведено дека до Аквадуктот се стигнува по земјен пат, без соодветни патокази и информативни табли и покрај расфрлан отпад. Според тогашниот одговор од Министерството за култура и туризам, за непосредна заштита на споменикот во претходните години биле издвоени повеќе од 360.000 евра, а биле изведувани и работи за дренажа и стабилизација на столбовите.

— реклама —

Министерството тогаш посочило дека чистењето на дивите депонии околу споменикот, казнувањето на лицата што фрлаат отпад, оградувањето и обезбедувањето на локалитетот се во надлежност на Град Скопје.

И покрај статусот на културно наследство од највисока категорија и досегашните конзерваторски интервенции, фотографиите што сега ги објави Многуфина повторно го отвораат прашањето за состојбата на просторот околу Скопскиот аквадукт.

— реклама —