По реакциите за „Секси мама“ во „Македониумот“, директорот на Историскиот музеј во Крушево си поднесе оставка

Директорот на НУ „Историски музеј“ – Крушево, Миха Оџаклиески, денеска поднесе неотповиклива оставка по реакциите во јавноста за снимањето на музичкиот спот „Секси мама“ во „Македониумот“.

— реклама —

Оџаклиески ја опиша својата одлука како личен, морален и етички чин, со кој, како што наведува, презема одговорност кон институцијата и јавноста.

Оставката доаѓа по реакциите за снимањето на спотот на косовскиот рапер Дон Џони во внатрешноста на „Македониумот“, кој е заштитено културно наследство.

— реклама —

Претходно, Оџаклиески потврди дека просторот бил отстапен за потребите на продукцијата за надомест од околу 500 евра. Според него, снимањето траело од пет до шест часа.

— реклама —

Тој посочи дека Управниот одбор донел одлука со која се овозможува користење на просторот за снимања, соодветно наменети и со предвиден надомест.

Снимањето на спотот предизвика низа реакции во јавноста, при што дел од уметничката и пошироката јавност го оценија како несоодветно користење на простор со историско и културно значење.

Случајот отвори и прашања за начинот на користење на културно-историските споменици за комерцијални продукции и за критериумите според кои се одобрува нивното користење.