Раперот Дон Џони по реакциите за спотот во Македониумот: Не сакавме никого да навредиме

Косовскиот рапер Дон Џони се огласи по реакциите во јавноста за снимањето на неговиот нов спот за песната „Секси мама“ во внатрешноста на споменикот „Илинден“ во Крушево, познат како Македониум.

Во објава на социјалните мрежи, раперот вели дека ниту тој ниту неговиот тим немале намера да провоцираат, навредуваат или да ја омаловажат вредноста на местото и неговата симболика.

— реклама —

„Локацијата беше само дел од сценариото и ја избрав поради продукцијата. Немаше навредливи пораки, тенденција за провокација или каква било друга цел“, наведе Дон Џони.

— реклама —

Тој додава дека целта била исклучиво уметничка и продукциска и дека немало намера да се навреди кој било национален симбол.

Снимањето во Македониумот предизвика реакции во јавноста, особено по информациите дека просторот бил отстапен за снимање за 500 евра. Дополнителни реакции предизвика и фактот што во комплексот се наоѓа гробот на Никола Карев, а спотот е за песната „Секси мама“.

— реклама —

За случајот се огласи и министерот за култура Седат Сулејмани, кој оцени дека станува збор за чувствително прашање и најави разгледување на можностите за понатамошно постапување во рамките на законските одредби.

Реакција имаше и од премиерот Христијан Мицкоски, кој се извини во име на одговорните и најави дека ќе побара разрешување на директорот на Историскиот музеј во Крушево и на членовите на Управниот одбор.

По реакциите, директорот на НУ Историски музеј – Крушево, Миха Оџаклиески, поднесе неотповиклива оставка, опишувајќи ја одлуката како личен, морален и етички чин и израз на одговорност кон институцијата и јавноста.