Пет лица загинаа, а четворица се полесно повредени во пожарот што избувна во петкатна станбена зграда во Манлеу, близу Барселона, објави весникот „El Pais“.
Се верува дека сите жртви биле млади лица, а можно е некои да биле и малолетници.
Пожарот бил пријавен синоќа во 21:10 часот, а избувнал во остава на покривот на зградата.
Пожарникарите испратиле 13 екипи на лице место, а огнот бил изгаснат во 21:41. Причината за пожарот засега не е позната.
Според известувањата, најмалку четири жртви се наоѓале во просторот каде избувнал пожарот и не успеале да избегаат поради причини што сè уште се утврдуваат.
Процесот на идентификација на телата ќе биде завршен денес.
Истражната единица „Mossos d’Esquadra“ покренала истрага за причините за пожарот.
Сите повредени лица добиле полесни повреди и не биле хоспитализирани.
Претседателот на каталонската влада, Салвадор Иља, изрази сочувство до семејствата на загинатите и посака брзо закрепнување на повредените, додека градоначалникот на Манлеу, Арнау Ровира, прогласи тридневна жалост.
Знамињата ќе бидат спуштени на половина копје, а минута молчење е закажана за вторник во 19 часот пред Градската куќа.
Според податоците на Цивилната заштита, три семејства се привремено сместени во хотел во Манлеу, додека останатите станари се вратиле во своите домови.
