(Фото) Пари, возила и документација пронајдени при претреси во Куманово, неофицијално се истражува организиран криминал поврзан со лихварство

Голема полициска акција се спроведува утрово во Куманово, каде што полициски специјалци и истражители вршат претреси на повеќе локации поврзани со лица осомничени за организиран криминал, дознава Скопје1 од извори запознаени со истрагата.

Според неофицијалните информации, акцијата е насочена кон организирана криминална група за која постојат сомневања дека подолг временски период дејствувала на подрачјето на Куманово и пошироко, занимавајќи се со изнуда, лихварство и перење пари.

— реклама —

Истражните органи се сомневаат дека припадниците на групата користеле закани, насилство и уцени за да остваруваат противправна материјална корист.

Според информациите на Скопје1, за организатор на групата се сомничи лице познато под прекарот „Штука“, а меѓу останатите осомничени има и други лица од Куманово.

— реклама —

Во рамките на акцијата се вршат проверки и на локации поврзани со нотарска канцеларија и менувачница, при што се испитува дали и на кој начин тие биле поврзани со сомнителните финансиски активности.

— реклама —

Неофицијално, при досегашните претреси биле пронајдени парични средства, возила и документација што би можеле да бидат значајни за понатамошната истрага.

Акцијата, според нашите извори, следува по подолготрајна оперативно-истражна работа на Одделот за сузбивање на организиран и сериозен криминал при Бирото за јавна безбедност, во координација со Јавното обвинителство за гонење организиран криминал и корупција.

— реклама —

Засега нема официјални информации за бројот на осомничени лица, евентуални приведувања и точниот обем на запленетите предмети.

Се очекува надлежните институции дополнително да соопштат детали за акцијата, идентитетот на осомничените и кривичните дела што се предмет на истрагата.