Група од Куманово со закани изнудувала пари од граѓани, предложен притвор за тројца

Основното јавно обвинителство за гонење организиран криминал и корупција отвори истрага против четири лица осомничени за злосторничко здружување, изнуда и перење пари. За тројца од нив е побаран притвор, додека четвртиот веќе извесен период се наоѓа надвор од државата.

— реклама —

Според обвинителството, групата ја формирал првоосомничениот од Куманово, а од 2021 година наваму нејзините членови со сериозни закани изнудувале пари од оштетени лица, искористувајќи ја нивната финансиска зависност поради претходно земени заеми.

Во еден од случаите, оштетена жена позајмила 4.000 евра од првоосомничениот, со договор сумата да ја врати за еден месец, со дополнителни 2.500 евра камата. Иако го исплатила договорениот износ, осомничениот подоцна побарал да ја користи нејзината банкарска сметка за префрлање пари прибавени со изнуда. Откако таа одбила, почнал да ѝ се заканува и барал нејзиниот автомобил да биде искористен како наводен залог за фиктивни долгови.

— реклама —

По налог на осомничениот биле изготвени фиктивен договор за купопродажба на возилото и договор за заем од еден милион денари. На документите бил фалсификуван потписот на оштетената, а договорите биле заверени кај нотар без нејзино знаење. Нотарот е осомничен за несовесно работење во службата, а за него е предложено определување мерки на претпазливост.

— реклама —

Обвинителството наведува дека групата подоцна повторно ѝ се заканувала на жената да го предаде автомобилот и да го исплати наводниот долг. Врз основа на фиктивните документи, сопственоста на возилото била префрлена на еден од осомничените, а оштетената била принудена да им исплати и пари.

Во друг случај, маж во 2021 година на двапати позајмил по 180.000 денари од осомничениот организатор на групата, бидејќи му биле потребни средства за лекување на сопругата. Иако ги вратил позајмените пари, осомничените продолжиле да бараат дополнителни исплати наводно за камата. Потоа го принудиле да ја отстапи својата банкарска сметка за преку неа да префрлаат големи суми пари прибавени со изнуда, прикажувајќи ги како заеми, а потоа да ги подигнуваат во готовина.

— реклама —

За тројцата осомничени обвинителството доставило предлог за определување притвор до судија на претходна постапка во Основниот кривичен суд Скопје.