Лихварски заеми, лажни договори и украдени возила: Разбиена криминална група во Куманово, четворица уапсени, еден во бегство

Петчлена организирана криминална група од Куманово е сузбиена во полициска акција спроведена на 5 ноември, под раководство на јавен обвинител од Основното јавно обвинителство за гонење на организиран криминал и корупција. Четири лица се лишени од слобода, додека петтиот осомничен е недостапен за органите на прогонот.

Од Министерството за внатрешни работи информираат дека кривична пријава е поднесена против Д.П. (37), Л.К. (73), М.К. (27), Д.Ж. (43) и З.Р. (35), сите од Куманово, за изнуда и перење пари и други приноси од казниво дело.

— реклама —

При акцијата биле извршени претреси на шест локации, при што биле одземени договори за заем со нереално високи камати, договори за недвижен имот, поголема сума пари, патнички возила, мобилни телефони и други електронски уреди.

— реклама —

Според досегашните сознанија на истрагата, Д.П. во 2021 година формирал група за вршење кривични дела. Во еден од случаите, во 2023 година, оштетено лице побарало заем од 4.000 евра, со договор да го врати за еден месец и да плати камата од 2.500 евра.

Иако долгот бил целосно вратен, осомничениот наводно побарал од лицето да ја користи неговата банкарска сметка за фиктивни уплати и повлекувања. Потоа, заедно со З.Р., му упатувале закани и барале неговото возило да биде ставено како наводен залог за фиктивни долгови.

— реклама —

По налог на Д.П., биле изготвени фиктивен договор за купопродажба на возилото, со фалсификуван потпис на оштетениот, и договор за заем од еден милион денари. Врз основа на лажниот договор била променета сопственоста на возилото на име на З.Р., додека за наводниот долг била поведена извршна постапка, по што на оштетеното лице му била блокирана банкарската сметка.

— реклама —

Во друг случај, друго лице во два наврати позајмило вкупно 180.000 денари од Д.П. Иако ги вратило парите, осомничениот побарал дополнително да му биде исплатена камата.

Истрагата продолжува, а кривичната пријава е поднесена до Основното јавно обвинителство за гонење на организиран криминал и корупција.