Графиките со македонското знаме што се прикажуваат на видеобимовите за време на музичко-сценскиот спектакл „Силно светнал ден“ се променети. На синоќешниот настан во Битола сонцето на знамето беше прикажано со точниот број – осум краци, што може да се забележи и на фотографиите објавени од битолскиот градоначалник Тони Коњановски.
Корекцијата следува откако на претходното издание на спектаклот во Охрид на видеобимовите беше прикажана стилизирана верзија на македонското знаме со 12 наместо со осум краци. Грешката предизвика реакции во јавноста, особено затоа што караванот „Силно светнал ден“ се организира по повод 35-годишнината од независноста на Македонија.
Од фотографиите од Битола сега се гледа дека спорната графика е променета и дека сонцето е прикажано со осум краци.
Спектаклот во Битола се одржа на платото пред Офицерскиот дом, а Коњановски објави фотографии од настанот и порача дека просторот бил претесен за многубројната публика.
„Силно светнал ден во Битола, нека ни е вечна Македонија, едногласна беше пораката на многубројната публика која синоќа беше дел од програмата за прославата на независноста на Македонија.“
Спектакуларно и претесно беше на платото пред Офицерскиот дом во Битола каде пристигна караванот со музичко-сценскиот спектакл „Силно светнал ден“, по повод 35 години независност на Македонија“, напиша Коњановски.
„Силно светнал ден“ е музичко-сценски проект кој патува низ повеќе македонски градови по повод 35 години од независноста, со настапи на повеќе македонски музички изведувачи.
