Музичко-сценскиот спектакл „Силно светнал ден“, со кој во Охрид започнаа настаните посветени на 35-годишнината од независноста на Македонија, привлече внимание не само со богатата програма, туку и со дел од визуелниот идентитет на сцената.
На стадионот „Билјанини извори“ настапија Игор Џамбазов и повеќе од 30 македонски изведувачи, а преку музика, театар и поезија беше претставена приказната за македонската држава, нејзината историја, успеси, загуби и генерации.
Сепак, во текот на настанот внимание привлече симболот прикажан на дел од сценографијата и видео-бимовите. Тој визуелно потсетува на македонското државно знаме, но сонцето е прикажано со значително повеќе зраци од официјалното знаме.
Македонското државно знаме е црвено, со жолто сонце во средината од кое се шират осум зраци кон рабовите.
Токму бројот на зраците ја прави разликата со симболот што се појави во рамките на охридскиот спектакл. Снимките и фотографиите од настанот, вклучително и директниот пренос на МРТ и на Јутуб, покажуваат дека сличен симбол можел да се забележи на повеќе места – на сценографијата и видео-бимовите.
