Француските власти ѝ наредија на руската новинарка Ксенија Фјодорова да ја напушти земјата поради обвинувања дека преку француски телевизии и радиостаници ширела ставови блиски до Кремљ, соопшти француското Министерство за внатрешни работи.
Според телевизијата France 24, одлуката за протерување следувала по предупредувања од експерти за дезинформации за влијанието на поранешната директорка на францускиот огранок на рускиот државен медиум RT France, кој беше забранет во Франција по почетокот на војната во Украина.
Францускиот весник Libération објави дека во решението за протерување се наведува оти Фјодорова дејствувала „како канал за кампањи на дезинформации организирани од руските власти“, со цел „дестабилизација на јавниот ред“ во Франција.
Иако RT France беше затворен во 2023 година, Фјодорова продолжила да настапува како коментаторка на телевизискиот канал CNews и радиото Europe 1, а пишувала и колумни за весникот Le Journal du Dimanche.
Нејзините критичари тврдат дека во своите јавни настапи пренесувала ставови блиски до Кремљ за војната во Украина и односите меѓу Русија и Западот.
Адвокатот на Фјодорова, Емануел Пивница, најави дека неговата клиентка веднаш ќе поднесе жалба на одлуката за протерување.
„Ксенија Фјодорова е новинарка. Оваа одлука претставува сериозен напад врз слободата на изразување на професионалец кој секогаш ја извршувал својата работа на најкоректен начин“, изјави тој.
Фјодорова ги отфрли обвинувањата дека била канал за ширење на ставовите на Кремљ во француските медиуми.
