Франција за првпат активира кризен план поради екстремните горештини

Француската влада денеска првпат ќе го активира националниот кризен план ОРСЕК како одговор на екстремниот топлотен бран што ја зафати земјата. Мерката ќе се применува во сите департмани каде што е прогласен највисокиот, црвен степен на тревога поради високите температури.

— реклама —

Владината портпаролка Мод Брежон соопшти дека ќе бидат отворени разладни центри за згрижување на најранливите категории граѓани, со цел да се намалат последиците од екстремните горештини.

Кризниот план, претставен на 2 јули, предвидува координирана акција на сите јавни служби во услови на екстремно високи температури. Во рамки на мерките ќе бидат ангажирани дополнителни ресурси, а посебно внимание ќе им се посвети на лицата кои живеат сами и се во изолација.

— реклама —

Според најновите информации од француската метеоролошка служба „Метео Франс“, од денеска напладне девет департмани во западниот дел на земјата ќе бидат под црвен степен на тревога, додека во уште 72 е во сила портокалов степен на предупредување.

— реклама —

Метеоролозите очекуваат топлотниот бран, кој трае од 4 јули, да продолжи најмалку до вторник, а од недела повторно се прогнозира дополнително зголемување на температурите.

Долготрајните горештини придонесоа и за зголемен број шумски пожари. Само во првата седмица од јули изгореле 9.921 хектар земјиште, што е речиси трипати повеќе во споредба со истиот период минатата година.

— реклама —

Поради високиот ризик од пожари, француските власти откажаа и повеќе огномети планирани по повод Денот на падот на Бастилја, меѓу кои и во департманите Еро и Ванде.