Фондот за здравствено осигурување на Македонија (ФЗОМ) соопшти дека заклучно со 28 јули 2026 година исплатил вкупно 560,9 милиони денари за надоместоци за боледување.
Од вкупната сума, 420,3 милиони денари се исплатени за породилни отсуства, што, според Фондот, претставува највисока месечна исплата за оваа намена досега. За останатите видови боледувања исплатени се 140,6 милиони денари.
Од ФЗОМ нагласуваат дека нема застој во исплатата на породилните надоместоци. По исполнувањето на законските услови за првата исплата, средствата за следните месеци се исплаќаат континуирано, по завршување на административната обработка, контролата и одобрувањето на предметите.
За останатите видови боледувања, покрај обработката и контролата на документацијата, законски услов за исплата е да бидат уплатени придонесите за месецот за кој се однесува надоместокот.
Од Фондот посочуваат дека остануваат посветени на навремена обработка на предметите и редовна исплата на средствата, со цел осигурениците непречено да ги остваруваат своите законски права.
