ФЗОМ: Подготвени сме за дијалог со приватните гинеколози, но потребни се аргументи

Фондот за здравствено осигурување ги отфрла тврдењата дека избегнува разговори со приватните гинеколози и уверува дека останува отворен за преговори и изнаоѓање заеднички решенија. Од институцијата велат дека несогласувањата треба да се надминат преку аргументирана дискусија, а не преку јавни полемики.

— реклама —

„Фактите се јасни. На 28 октомври 2026 година, д-р Костадинов, заедно со претставници на приватните гинеколози, оствари работна средба со генералниот директор на Фондот и претставници на стручните служби. На средбата беа разгледани отворените прашања и беше договорено продолжување на разговорите. На денешната средба, организирана токму за разгледување на предложените договорни решенија, наместо аргументирана дискусија, претседателот на Здружението не понуди конкретни образложенија за своите ставови и ја напушти средбата“ стои во соопштението од Фондот.

— реклама —

Во врска со барањето во договорите да бидат прецизирани видот, обемот и зачестеноста на гинеколошките прегледи опфатени со капитацијата, од Фондот објаснуваат дека овие прашања се уредени со законската и подзаконската регулатива и медицинските стандарди, а не со поединечните договори со избраните лекари.

„Во однос на барањето во договорите да бидат наведени видот, обемот и фреквенцијата на гинеколошките прегледи опфатени со капитацијата, Фондот појаснува дека овие прашања се уредуваат со соодветната законска и подзаконска регулатива и медицинските стандарди, а не со поединечните договори со избраните лекари. Договорите ги уредуваат меѓусебните права и обврски, како и условите и начинот на финансирање“ велат од ФЗОМ.

— реклама —

И покрај несогласувањата, Фондот предлага формирање заедничка работна група со претставници на Здружението, која ќе ги разгледа доставените предлози и, доколку се утврди потреба, ќе иницира измени на соодветните подзаконски акти.

— реклама —

Од институцијата нагласуваат дека ги почитуваат приватните матични гинеколози и остануваат подготвени за соработка, но дека приоритет мора да бидат интересите на осигурениците, достапноста на услугите и почитувањето на прописите.