Пациентите кои користат инхалациска терапија за астма и хронична опструктивна белодробна болест (ХОББ) од 1 август се очекува да можат да го подигнуваат лекот „Фостер“ без доплата, со партиципација од 280 денари. Воедно, од 1 јануари партиципацијата за антикоагулансот „Ксарелто“ ќе изнесува само 160 денари, соопшти директорот на Фондот за здравствено осигурување, Сашо Клековски, на денешната прес-конференција.
Тој објасни дека Фондот работи на намалување на цените на лековите преку проширување на позитивната листа и поттикнување на генеричка конкуренција, што, според него, е препорачан модел и од Светската здравствена организација.
Клековски посочи дека цената на „Ксарелто“, која претходно изнесувала околу 2.200 денари, ќе биде преполовена до крајот на годината, а од 1 јануари пациентите ќе плаќаат само 160 денари партиципација.
Како втор пример го наведе лекот „Фостер“, кој досега бил единствениот производ во својата категорија. По влегувањето на генеричкиот лек „Блоцета“ на позитивната листа, референтната цена е намалена од 2.715 на 1.915 денари.
„Производителот на „Фостер“ прифати лекот да се продава по новата пониска референтна цена. Очекувам од 1 август да биде достапен без доплата, а пациентите ќе плаќаат само партиципација од 280 денари“, изјави Клековски.
Тој додаде дека заштедените околу 50 милиони денари нема да бидат пренаменети за други трошоци, туку ќе бидат искористени за воведување нова генерација лекови за пациентите со астма и ХОББ до крајот на годинава.
Во однос на примената на новите правила, директорот на ФЗО призна дека постојат одредени почетни потешкотии кај аптеките и матичните лекари, делумно поради промените во софтверските системи и набавките на лекови по старите цени.
Тој информираше дека Фондот веќе започнал контроли по претставки од пациенти. Досега биле евидентирани претставки за пет аптеки во Битола, две во Скопје и еден матичен лекар, главно поради неиздавање лекови на рецепт или нивно нудење само со приватно плаќање.
Клековски потсети дека, согласно договорите со Фондот, сите аптеки имаат обврска да обезбедат достапност на лековите што се наоѓаат на позитивната листа.
