Плаќаат ли пациентите за услуги што веќе ги покрива Фондот? ФЗОМ влегува со засилени контроли во здравствените установи

Здравствените установи кои имаат склучено договор со Фондот за здравствено осигурување ќе бидат под засилен надзор, со цел да се утврди дали доследно ги почитуваат правилата за наплата на медицинските услуги и дали има случаи на неоправдано наплаќање од пациентите.

— реклама —

Фокусот на контролите ќе биде ставен на евентуалната двојна наплата, односно на ситуации во кои за една иста здравствена услуга установата добива средства од Фондот, но истовремено бара плаќање и од осигуреникот.

Од ФЗОМ појаснуваат дека пациентите не треба да плаќаат дополнителни средства за услугите што се покриени со задолжителното здравствено осигурување. Исклучок е законски утврдената партиципација, доколку таа е предвидена за конкретната услуга. Ова правило важи за сите три нивоа на здравствена заштита – примарното, секундарното и терцијарното.

— реклама —

При проверките ќе се утврдува дали наплатените услуги навистина биле извршени, дали се правилно прикажани во фактурите и дали сумите побарани од пациентите се во согласност со пропишаната партиципација.

— реклама —

Фондот потсетува дека здравствените установи мора на достапно место да ги објават цените на партиципацијата и за секоја извршена наплата да издадат законски доказ. Пациентите, од друга страна, имаат право да знаат кои услуги ги покрива осигурувањето и дали воопшто треба да доплатат.

Во случај на утврдени прекршувања, ФЗОМ најавува преземање мерки во согласност со договорните обврски и важечките прописи.

— реклама —

Граѓаните кои сметаат дека им била наплатена услуга што требало да биде покриена од Фондот можат да го пријават случајот во Секторот за контрола на ФЗОМ. Од институцијата посочуваат дека пријавите ќе се обработуваат со заштита на приватноста и личните податоци на осигурениците.