Фонд за здравствено осигурување на Република Македонија денеска презентираше анализа за болничкото лекување во периодот 2023–2025 година, според која здравствениот систем бележи раст на бројот на пациенти, зголемени вложувања и подобрување на дел од болничките услуги низ државата.
На прес-конференцијата, генералниот директор Сашо Клековски и заменик-директорот Седат Бислими ги презентираа клучните наоди од аналитичкиот извештај.
Според податоците, во 2025 година биле лекувани 194.230 пациенти, додека договорните буџети за болничко лекување за две години се зголемиле за 24 проценти.
Кај универзитетските клиники е регистриран уште поголем раст, при што буџетите се зголемени за 33 проценти.
Анализата покажува и намалување на кардиоваскуларните хоспитализации за 2,9 проценти, додека девет од дванаесет регионални болници бележат подобрување на индексот CMI, кој ја мери сложеноста на случаите што се третираат.
Од Фондот посочуваат дека сè повеќе сложени медицински случаи се лекуваат и надвор од Скопје, што, според нив, укажува на постепено јакнење на регионалните болници и подобар пристап до здравствени услуги за граѓаните низ државата.
Во извештајот се оценува дека здравствениот систем останува стабилен, со позитивни трендови во болничкото лекување и постепено подобрување на условите за пациентите.
