Германската влада одлучи да го продаде енергетскиот гигант Uniper, три години откако компанијата беше национализирана поради последиците од конфликтот меѓу Русија и Украина.
Огласот објавен во „Financial Times“ покажува дека како можности се разгледуваат директна продажба на компанијата и/или излегување на берза преку иницијална јавна понуда на акции.
Унипер, најголемиот германски увозник на гас, западна во сериозни финансиски проблеми во 2022 година, кога Русија ги прекина испораките на гас.
Германската влада тогаш ја спаси компанијата со пакет помош вреден повеќе милијарди евра и практично стана нејзин единствен сопственик, пренесува ДПА.
Европската унија го одобри договорот под услов државата до крајот на 2028 година да го намали својот удел на најмногу 25 проценти плус една акција.
Според весникот „Süddeutsche Zeitung“, германската влада е подготвена за продажба на еден или повеќе пакети акции на инвеститори, берзанско котирање или комбинација од двата модели.
Целиот процес треба да заврши до ноември, додека подготовките за иницијална јавна понуда на акции се планирани за јануари 2027 година.
Инвеститорите можат да го пријават својот интерес до 12 јуни.
Во известувањето се наведува и дека германската влада по приватизацијата планира да задржи удел од 25 проценти плус една акција во Унипер, со што би обезбедила блокирачко малцинство.
