Германската влада наскоро ќе ги објави сознанијата за тоа кој стои зад обидот за напад со дронови на аеродромот во Лајпциг, најави канцеларот Фридрих Мерц, притоа предупредувајќи дека одговорните ќе се соочат со сериозни последици.
Инцидентот се случил на 4 август и, според Мерц, претставува уште еден показател дека Германија е сè почесто изложена на хибридни закани.
„Ќе платат за тоа“, порача германскиот канцелар во пресрет на седницата на Владата во Нојхарденберг, но додаде дека деталите од истрагата нема да бидат објавени на самата седница.
Мерц оцени дека извршителите на ваквите напади стануваат сè посмели и дека свесно преземаат ризик од голема материјална штета, но и од повредени или човечки жртви.
Германската влада, како што посочи, презема мерки за заштита од вакви закани, меѓу кои е и планираното формирање Центар за дронови во Магдебург. Истовремено, Берлин најавува и мерки за одвраќање.
„Германија испраќа јасна порака – оние што стојат зад хибридните напади ќе се соочат со сериозни последици“, порача Мерц.
Според информации на германските медиуми, дрон со експлозив бил насочен кон украински товарен авион на аеродромот во Лајпциг. Безбедносните служби, според досегашните сознанија, веруваат дека во обидот биле користени три дрона.
Поради германската воена и политичка поддршка за Украина, постои сомнеж дека зад нападот би можела да стои Русија, но конечните наоди за сторителите сè уште не се официјално објавени.
По новиот случај, дел од германските политичари бараат поостар одговор кон Москва. Пратеникот Себастијан Фидлер од СПД порача дека е време рускиот претседател Владимир Путин да ги почувствува последиците, вклучително и преку мерки против таканаречената „флота во сенка“ која оперира во близина на германскиот брег.
