Германскиот канцелар Мерц направи кадровски промени во Владата

Германскиот канцелар Фридрих Мерц најави кадровски промени во Владата, кои се однесуваат на членовите на неговата Христијанско-демократска унија (ЦДУ), во период кога владината коалиција се соочува со историски ниска поддршка, а десничарската Алтернатива за Германија (АфД) бележи раст на популарноста.

— реклама —

Досегашниот шеф на Кабинетот на канцеларот, Торстен Фрај, ќе го преземе раководењето со пратеничката група на ЦДУ/ЦСУ во германскиот парламент. На неговото место доаѓа досегашната министерка за здравство, Нина Варкен, која Мерц ја опиша како „цврст преговарач“.

— реклама —

Нов министер за здравство ќе биде Карстен Линеман, досегашен генерален секретар на ЦДУ, кој ќе продолжи со реформите во здравствениот систем. Воедно, Филип Амтор е именуван за државен министер задолжен за односите меѓу федералната власт и сојузните покраини.

До промените дојде по оставката на Јенс Шпан од функцијата шеф на пратеничката група на ЦДУ/ЦСУ. Тој се повлече по силниот притисок од јавноста и од сопствената партија, откако објави дека со својот партнер станал родител преку сурогат-мајка во САД, практика која е забранета во Германија и на која претходно и самиот принципиелно ѝ се спротивставуваше.

— реклама —

Според јулското истражување на агенцијата „Ипсос“, само 17 проценти од германските граѓани се задоволни од работата на владината коалиција, а доверба во канцеларот Мерц имаат 16 проценти. Во исто време, АфД, според анкетите, е најсилната политичка партија со поддршка од околу 29 проценти.

— реклама —

Мерц најави дека кадровските промени нема да завршат тука и дека во наредните денови ќе следуваат уште измени во составот на Федералната влада. Аналитичарите оценуваат дека реконструкцијата претставува обид за зајакнување на Владата пред спроведувањето на клучните реформи и пред покраинските избори во септември, на кои АфД има значителна предност во дел од источните германски покраини.