„Ѓорѓиевски и Цветковски преку фондација „Скопје - европска престолнина на културата“ го претвараат во приватен проект“, велат од Левица

Левица преку соопштение остро реагира на Предлог-законот за спроведување на проектот „Скопје – Европска престолнина на културата 2028“, оценувајќи дека наместо да обезбеди транспарентно управување со јавните средства, тој отвора простор за злоупотреби и нетранспарентно трошење на пари.

Од партијата посочуваат дека проектот ќе се финансира со повеќе од 20 милиони евра, од кои најголемиот дел се јавни средства обезбедени од Владата, Град Скопје и скопските општини, но, како што тврдат, предложеното законско решение предвидува Фондацијата „Европска престолнина на културата – Скопје 2028“ да не подлежи на Законот за јавни набавки.

— реклама —

Според Левица, дополнителен проблем е што градоначалникот Орце Ѓорѓиевски веќе го именувал Марјан Цветковски за директор, иако Фондацијата сè уште не е формирана со закон.

— реклама —

„Се поставува прашањето врз која правна основа е именуван директор на непостоечка фондација“, велат од партијата.

Левица предупредува и дека законот овозможува Фондацијата да користи и инвестира во јавен и приватен имот, што, според нив, отвора дилеми дали со јавни средства ќе се финансираат зафати на приватни објекти или ќе се набавуваат уметнички дела што подоцна би останале во приватна сопственост.

— реклама —

Од партијата забележуваат и дека Советот на Град Скопје нема предвидена улога во надзорот врз работењето на Фондацијата, додека управувачките и финансиските овластувања, според нив, се концентрирани кај градоначалникот и директорот.

— реклама —

Дополнително, Левица критикува што законот се носи по скратена постапка, без поширока јавна и стручна расправа за проект кој ќе располага со значителни јавни средства.

Според партијата, доколку крајната цел е формирање јавна установа по завршувањето на проектот, тогаш и самиот проект уште од почеток треба да биде организиран како јавна институција што ќе работи според важечките правила за јавни набавки и финансиска отчетност.