Ѓорѓиевски ја обвини СДСМ за политизирање на западнонилската треска и ги посочи датумите за прскањето

Градоначалникот на Скопје, Орце Ѓорѓиевски, реагираше на обвинувањата на СДСМ за наводно задоцнето справување со комарците и зголемениот број случаи на западнонилска треска. Тој оцени дека сериозна здравствена тема не треба да се претвора во дневнополитичка пресметка.

Ѓорѓиевски посочи дека западнонилската треска не е ново заболување и дека вирусот циркулира во повеќе европски земји, меѓу кои и во соседството на Македонија. Според него, граѓаните треба да добиваат навремени информации и превентивни мерки, а не да се создава дополнителен страв.

— реклама —

Во однос на дезинсекцијата, градоначалникот ги отфрли тврдењата дека Градот Скопје задоцнил со активностите и ги посочи датумите на досегашните третмани. Тој направи и споредба со 2018 година, кога, според него, првата теренска дезинсекција започнала на 3 јули, а авионското прскање било спроведено на 7 и 8 јули.

Ѓорѓиевски нагласи дека во 2026 година активностите започнале уште на 7 мај. Досега биле реализирани седум третмани против ларви – на 7 мај, 11 и 26 јуни, 10 и 23 јули и 11 и 18 август.

— реклама —

Дополнително, биле спроведени шест циклуси на дезинсекција против возрасни комарци – авионски на 1 и 2 јуни, 27 и 28 јуни и 30 и 31 јули, како и теренски на 18 и 20 јуни, 13 и 15 јули и 4 и 6 август.

Градоначалникот информираше дека веќе се закажани нови третмани – авионска дезинсекција во четврток и петок, а теренска од недела до среда.

Според Ѓорѓиевски, сите активности се спроведуваат согласно годишната програма, законските обврски, елаборатот на Центарот за јавно здравје – Скопје и препораките на Министерството за здравство и европската регулатива.

— реклама —

„Јавното здравје не се штити со прес-конференции, создавање страв или политички сензации, туку со системска работа, континуирана превенција и навремени активности на терен“, порача Ѓорѓиевски.

Тој очекува политичките субјекти да покажат поголема одговорност кога зборуваат за здравјето на граѓаните, додавајќи дека Град Скопје ќе продолжи со дезинсекцијата согласно стручните препораки и утврдената динамика.