Ѓорѓиевски: Македонија ќе оди напред затоа што има горд и непокорен народ

Градоначалникот на Скопје, Орце Ѓорѓиевски, по повод 8 Септември – Денот на независноста, упати честитка до граѓаните, истакнувајќи го историското значење на референдумот одржан пред 35 години.

„Македонијо, честит празник! На 8 Септември, пред 35 години, македонскиот народ јасно и одлучно ја избра независноста“, напиша Ѓорѓиевски.

— реклама —

Тој посочи дека со референдумската одлука бил крунисан вековниот стремеж за сопствена, слободна и суверена држава, која ги чува македонскиот јазик, идентитетот, културата, историјата и вековното постоење.

„И тогаш имало такви што не сакале Македонија да биде независна. Ги има и денес. Но сме ги победиле еднаш, сме ги победувале многупати и цврсто знам дека Македонија ќе оди напред, затоа што има горд и непокорен народ кој верува во својата татковина и никогаш не се откажува од неа!“, наведува градоначалникот.

— реклама —

Во честитката Ѓорѓиевски посочува дека како нација, сите премрежја биле надминувани тогаш кога граѓаните биле обединети.

„Дури и кога патот бил трнлив и тежок, обременет со предизвици однатре и однадвор, сме имале сила да истраеме и да продолжиме напред“, пишува тој.

Ѓорѓиевски нагласува дека должност на граѓаните е достоинствено и сплотено да се гради посилна, поуспешна и просперитетна Македонија.

— реклама —

„На нашите деца и на неродените поколенија мора да им оставиме здрава, стабилна и достоинствена држава. Трулото минато нека остане само бледо сеќавање, а не судбина на идните генерации“, додава градоначалникот.

На крајот од честитката, Ѓорѓиевски порача: „Да живее независна и суверена Македонија! Македонијо, ќе бидеш вечна и вековита!“

— реклама —