Ѓорѓиевски: Над 1.200 онколошки пациенти побараа помош, исплатите се реализирани

Повеќе од 1.200 онколошки пациенти аплицирале на повикот за финансиска поддршка, а исплатата за сите што ги исполниле условите е завршена или ќе биде завршена во текот на наредниот ден, информира градоначалникот на Скопје, Орце Ѓорѓиевски.

Тој посочи дека секоја од пристигнатите апликации била разгледана со внимание и посветеност, со цел помошта да стигне до оние на кои им е најпотребна.

— реклама —

„Постојат моменти кога зборовите не се доволни. Моменти кога човечноста не се мери со тоа што ќе го кажеме, туку со тоа дали ќе подадеме рака кога некому му е најтешко“, порача Ѓорѓиевски.

Повикот за финансиска поддршка сè уште е отворен, што значи дека пациентите што ги исполнуваат условите и досега не аплицирале, можат да го сторат тоа.

— реклама —

Ѓорѓиевски нагласи дека зад секоја од бројките стои човек и семејство кое се соочува со тешка животна битка, поради што институционалната поддршка, според него, не треба да остане само на зборови.

— реклама —

„Наша човечка и институционална обврска е да бидеме покрај нашите сограѓани не само со зборови, туку со конкретни дела, грижа и поддршка“, истакна градоначалникот.

Тој додаде дека целта е ниту еден пациент и ниту едно семејство да не се чувствуваат сами во периодот кога им е најтешко.