Градоначалникот на Град Скопје, Орце Ѓорѓиевски по повод Меѓународниот ден на семејството го посети СОС Детско село, каде се сретна со децата, згрижувачките семејства и тимот на организацијата.
За време на посетата беа донирани подароци, а Ѓорѓиевски истакна дека најсилен впечаток кај него оставиле животните приказни, талентот и истрајноста на младите кои растат во СОС Детско село.
„Овие деца се вистински херои. Меѓу нив има стипендисти на американски колеџи, првенци на генерации и млади луѓе кои секојдневно покажуваат дека со поддршка, љубов и грижа нема невозможни патишта“, беше посочено по средбата.
Градоначалникот најави дека со следниот ребаланс на буџетот, Град Скопје ќе обезбеди средства за субвенции за секое згрижувачко семејство, со цел да се создадат подобри услови за децата и младите.
Дополнително, беше најавено дека иницијативата ќе биде покрената и преку ЗЕЛС до сите општини во државата, за обезбедување еднаков третман и поддршка за секое дете.
Како дел од долгорочните мерки, Град Скопје ќе иницира и меморандум со бизнис-заедницата за обезбедување загарантирани работни места за младите кои излегуваат од системот на згрижување.
При посетата беше изразена благодарност до директорката Јулијана Накова Гапо и целиот тим на организацијата за нивната посветеност и грижа кон децата.
