Градоначалникот на Скопје, Орце Ѓорѓиевски, соопшти дека градските служби се целосно подготвени за најавеното силно невреме што, според прогнозите на Управата за хидрометеоролошки работи, се очекува во попладневните часови.
Тој информира дека екипите на ЈП „Водовод и канализација“ – Скопје континуирано работат на расчистување на канализациската мрежа, шахтите и сливниците, со цел да се овозможи непречено одведување на атмосферските води и да се намали опасноста од поплавување на критичните точки во градот.
Според Ѓорѓиевски, Кризниот штаб на Град Скопје веќе одржал состанок и сите служби се ставени во состојба на целосна мобилизација. Екипите ќе бидат постојано на терен и подготвени веднаш да интервенираат доколку невремето предизвика проблеми.
Тој нагласи дека во функција се ставени сите расположливи човечки и технички капацитети, со цел да се заштитат граѓаните, нивниот имот и градската инфраструктура.
Воедно, градоначалникот апелираше до граѓаните да не фрлаат отпад во шахтите, сливниците и на јавните површини, бидејќи тоа го попречува одведувањето на дождовната вода и го зголемува ризикот од поплави.
„Град Скопје останува буден, мобилизиран и целосно посветен на заштитата на граѓаните“, порача Ѓорѓиевски.
