Годишен раст од 9,0% на вкупните депозити и од 13,6% на вкупната кредитна поддршка

Паричната маса во август продолжи да расте, при што монетарниот агрегат М3 на месечна основа е зголемен за 1,3 отсто, главно како резултат на растот на депозитните пари и краткорочните депозити.

На годишно ниво, паричната маса е зголемена за 8,2 отсто, што претставува дополнително забавување на годишната динамика. Раст е забележан кај сите компоненти на паричната маса.

— реклама —

Вкупните депозити во август се зголемиле за 1,6 отсто на месечна основа, при што растот главно произлегува од корпоративниот сектор. Во споредба со август минатата година, нивото на депозитите е повисоко за 9 отсто, со зголемување и кај депозитите на домаќинствата и кај оние на корпоративниот сектор.

Кредитната активност во август пораснала за 0,7 отсто на месечна основа, додека на годишно ниво растот изнесува 13,6 отсто. Зголемување е забележано кај кредитите и на домаќинствата и на корпоративниот сектор, при што домаќинствата имаат поголем придонес во месечниот раст, а корпоративниот сектор во годишниот.

— реклама —

Депозитите на корпоративниот сектор во банкарскиот систем во август се зголемиле за 6,2 отсто на месечна и за 6,1 отсто на годишна основа. Месечниот раст се должи на повисоките депозитни пари, додека годишното зголемување е резултат на растот на депозитните пари и долгорочно орочените депозити.

Кредитите на претпријатијата во август пораснале за 0,6 отсто на месечна основа, додека годишниот раст достигнал 15,1 отсто. Целокупното зголемување на кредитирањето на корпоративниот сектор произлегува од кредитите во домашна валута.

— реклама —

Кај домаќинствата, вкупните депозити во август се намалиле за 0,4 отсто на месечна основа, како резултат на намалувањето на депозитните пари. Сепак, на годишно ниво депозитите на населението се зголемиле за 10,2 отсто, при раст на сите нивни компоненти.

Орочените депозити на домаќинствата, без средствата на трансакциските сметки, во август бележат раст од 0,6 отсто на месечна и 5,8 отсто на годишна основа. Најголем дел од зголемувањето произлегува од повисоките долгорочно орочени депозити.

Кредитите на населението продолжиле да растат, со месечна стапка од 0,7 отсто и годишна стапка од 12,3 отсто. Растот главно се должи на кредитите одобрени во денари.

Според намената, во август се зголемиле и потрошувачките и станбените кредити. Потрошувачките кредити пораснале за 0,5 отсто на месечна и 12,2 отсто на годишна основа, додека станбените кредити бележат месечен раст од 0,6 отсто и годишен раст од 16,2 отсто.