Голема акција кај Торино: Откриени над осум килограми кокаин и шест килограми хашиш

Италијанската полиција заплени дрога со проценета вредност од 3,5 милиони евра и голема количина оружје во областа околу Торино, во рамки на две одделни полициски операции.

Дрогата и оружјето биле откриени во акции започнати во зори на 29 мај меѓу Босконеро и Торино, при што биле уапсени две лица, објави локалниот портал Torino Today.

— реклама —

Станува збор за 48-годишен албански државјанин и 34-годишен Италијанец, кои ѝ биле познати на полицијата. Тие се осомничени за поседување големи количества наркотични средства наменети за дистрибуција, нелегално поседување огнено оружје и прикривање украдена стока.

При претрес на домот на албанскиот државјанин во Торино биле пронајдени околу 10.000 евра во готовина со сомнително потекло. Во шумска област кај Босконеро, полицијата открила добро скриена залиха дрога закопана во земја и покриена со метални плочи.

— реклама —

Запленети биле 1,6 килограми кокаин, 530 грама хашиш, прецизни ваги и материјали за пакување на наркотиците.

— реклама —

Потоа претресот бил проширен и во домот на 34-годишниот Италијанец. Со помош на службени кучиња, полицајците на парцела поврзана со неговата куќа пронашле уште седум килограми кокаин и повеќе од 6,6 килограми хашиш.

Наркотиците биле складирани во херметички затворени кеси, скриени во пластични контејнери закопани под земја.

Полицијата пронашла и арсенал составен од полуавтоматска пушка, двоцевна сачмарка и пет пиштоли од различен калибар, меѓу кои и револвер. Според истражителите, оружјето најверојатно било претходно украдено.

Запленетите дрога и оружје се предадени како доказен материјал, а двајцата осомничени по налог на обвинителството се префрлени во затворот во Ивреа, додека истрагата продолжува.