Политичката партија Левица преку соопштение оцени дека случајот со загадената вода за пиење во Гостивар е последица на долгогодишната партизација на институциите и побара целосна кривична одговорност за сите инволвирани.
Според партијата, досегашните наоди од истрагата покажуваат дека во водоснабдителниот систем била пуштена непречистена вода, Институтот за јавно здравје утврдил присуство на фекални колиформни бактерии, а анализите покажале и зголемени концентрации на резидуален хлор, што, како што наведуваат, укажува на обид за санирање на веќе настанатата контаминација.
Од Левица сметаат дека станува збор за сериозен пропуст во управувањето со јавната инфраструктура, кој го загрозил здравјето на голем број граѓани. Според нив, покрај утврдувањето на индивидуалната одговорност, неопходно е да се отвори прашањето за системските причини што доведуваат до вакви случаи.
Во соопштението се посочува дека трагедии и скандали како автобуската несреќа на „Дурмо Турс“, случајот со Клиниката за онкологија, пожарот во Кочани и повеќе случаи на фемициди имаат заедничка причина – институционалниот распад, кој, според Левица, е резултат на долгогодишната партизација на државата.
Партијата ги обвинува СДСМ, ВМРО-ДПМНЕ, ДУИ и ВЛЕН дека со години ги пополнуваат раководните позиции според политичка лојалност, а не според стручност, со што, како што наведува, јавните претпријатија, инспекторатите и државните институции ја губат способноста да функционираат во интерес на граѓаните.
Од Левица нагласуваат дека партизацијата не е само кадровски, туку и безбедносен и општествен проблем, бидејќи создава институции кои неизбежно потфрлаат. Поради тоа, велат од партијата, покрај казнувањето на виновниците, неопходно е да се демонтира системот што, според нив, постојано создава нови пропусти и нови трагедии.
