Синдикатот на УПОЗ побара оставка од претседателката на Основниот суд Куманово, Снежана Манев, обвинувајќи ја за мобинг и навредливо однесување кон вработените во судската администрација. Според синдикатот, претставката против Манев ја потпишале 75 од вкупно 90 вработени во судската администрација.
Дел од вработените денеска, за време на паузата, излегоа пред зградата на судот за да го изразат незадоволството од атмосферата и условите во кои, како што велат, подолго време работат.
Претседателот на УПОЗ, Трпе Деаноски, на прес-конференција изнесе сериозни обвинувања за односот на Манев кон вработените, тврдејќи дека тие биле навредувани и по лична, верска и национална основа.
„Говеда, џукели, глупи сте, ништо не знаете, ќе ве запалам, ќе ве ставам под нозе, прво ќе те умрам, па ќе напуштам работа, вие од овој суд може да заминете само со брза помош“, се дел од зборовите кои, според Деаноски, претседателката им ги упатувала на вработените.
Тој тврди дека ваквото однесување не било изолиран случај, туку дека навредите се повторувале, понекогаш и пред странки и граѓани.
„Тоа се само дел од навредите кои секојдневно ги трпат вработените, а ги навредува и по верска и национална основа“, рече Деаноски.
Од УПОЗ посочуваат и на извештај на Судскиот совет од 2023 година, за кој Деаноски вели дека било констатирано оти претседателот на Основниот суд Куманово во голема мера ги нарушил меѓучовечките односи во судот.
Според претседателот на УПОЗ, вработените и претходно се обраќале до Судскиот совет и до Министерството за правда, но нивните реакции не довеле до разрешување на проблемот. Тој рече дека двајца претставници на Судскиот совет дошле во судот за да ја проверат автентичноста на потписите на вработените, но, според него, не биле преземени конкретни мерки во однос на наводите за однесувањето на Манев.
Синдикатот сега бара Судскиот совет веднаш да постапи по претставката и да ги испита сите наводи на вработените.
„Бараме Судскиот совет веднаш да постапи по претставката на вработените и да ги штити нив, а не претседателите и судиите кои го штетат угледот на судството во државата“, рече Деаноски.
УПОЗ бара да се испита и постапката во која Манев била избрана за претседателка на судот, како и наводите дека се мешала во надлежностите на административните службеници и покажувала интерес за конкретни судски предмети.
„Ја повикувам претседателката веднаш да престане со психичкото малтретирање на вработените и да си поднесе оставка. Го повикувам Судскиот совет сериозно да си ја сфати работата и да ги испита сите наводи од поднесената претставка“, порача Деаноски.
Од синдикатот најавуваат и радикализирање на протестот доколку надлежните институции не постапат. Деаноски предупреди дека вработените се подготвени да започнат протести, а како следен чекор го спомена и штрајкот.
„Доколку тоа не се случи, сите колеги кои се зад мене ќе почнат протести, а спремни сме да го затвориме судот со штрајк“, рече тој.
