Градежниот сектор продолжува да биде еден од главните носители на економскиот раст во земјата, покажуваат најновите податоци на Државниот завод за статистика за првиот квартал од 2026 година, соопшти Министерството за транспорт.
Според податоците, градежништвото во првите три месеци од годинава бележи раст од 7,2 проценти во споредба со истиот период лани, што, според Министерството, е показател за континуираната градежна активност и реализацијата на капиталните инвестиции низ државата.
Особено е нагласен растот во нискоградбата, каде е регистрирано зголемување од над 20 индексни поени. Во овој сегмент спаѓаат инвестициите во изградба на автопати, експресни, регионални и локални патишта, како и железничката инфраструктура.
Од Министерството наведуваат дека ваквите резултати се должат на засилените активности на терен и динамиката со која се реализираат инфраструктурните проекти.
Во соопштението се посочува дека изградбата на автопатските делници на Коридорите 8 и 10-д се одвива со интензивно темпо, додека паралелно се инвестира и во модернизација на железничката инфраструктура.
Дополнително, државната статистика покажува дека бруто-домашниот производ во првиот квартал од 2026 година пораснал за 3,1 процент.
Според Министерството за транспорт, овие показатели се доказ дека инвестициите даваат резултати и дека економијата бележи стабилен раст.
„Резултатите се потврда дека државата се движи во вистинска насока, а инфраструктурните проекти остануваат силна поддршка за економскиот развој и подобрувањето на условите за живот на граѓаните“, наведуваат од Министерството за транспорт.
