Градоначалникот на Дубровник предлага тестирање на сите политичари за дрога: „Камионите со кокаин сè уште пристигнуваат“

Градоначалникот на Дубровник, Мато Франковиќ, повторно го отвори прашањето за консумирањето кокаин во Хрватска, оценувајќи дека проблемот станува сè поизразен и предлагајќи воведување тестирање за дрога за сите политичари во земјата, пренесуваат хрватските медиуми.

Франковиќ на денешната седница на Градскиот совет изјавил дека камиони со кокаин и понатаму пристигнуваат во Дубровник и Хрватска, истакнувајќи дека побарувачката расте, меѓу другото, поради успешната туристичка сезона, но и инфлацијата и повисоките цени на горивата, пренесува хрватскиот портал „Индекс“.

— реклама —

„Камионите сè уште се тука. Тие редовно пристигнуваат и никогаш не доцнат. Цената расте, делумно поради инфлацијата и цената на горивото, а треба да се земе предвид и фактот дека зад нас е успешна туристичка сезона, поради што побарувачката дополнително се зголеми“, изјавил Франковиќ.

Тој додал дека станува збор за проблем што особено ги погодува помладите генерации и предупредил дека последиците од употребата на дрога долгорочно ќе ги трпи целото општество, вклучително и здравствениот систем и локалните буџети.

— реклама —

Градоначалникот на Дубровник оценил дека за овој проблем недоволно се зборува во јавноста бидејќи, според неговата процена, употребата на дрога е присутна и во државните институции.

— реклама —

„А зошто никој не зборува за ова? Затоа што, според мојата процена, нема институција во оваа држава во која нема најмалку 10 проценти корисници – почнувајќи од судовите, Државното обвинителство, па натаму, преку политиката, Хрватскиот сабор, општинските совети и собранијата. Замислете што би се случило кога би вовеле тестирање за дрога за сите политичари во Хрватска“, рекол Франковиќ.

Франковиќ и претходно зборувал за распространетоста на наркотиците во Дубровник. На седницата на Градскиот совет во октомври 2025 година изјавил дека количеството кокаин во градот се мери во камиони, а не во грамови, како и дека дрога се консумира на секој чекор, потсетува „Индекс“.

Тогаш предупредил и на достапноста на амфетамините и екстазитe за младите и го повикал Советот за превенција од криминал итно да реагира на градско и жупаниско ниво.

Зборувајќи за кокаинот, тогаш оценил дека оваа дрога станала достапна за луѓето кои имаат пари, но и дека за нејзиното консумирање мора отворено да се зборува бидејќи проблемот, како што навел, станал премногу голем.