Гужви пред „Алта банка“ во Битола, Брзата помош интервенирала неколкупати

Со полициско обезбедување, денеска повторно беа отворени шалтерите на „Алта банка“ АД Битола, но исплатата на средствата и натаму се одвива со ограничувања, а пред експозитурата повторно се создадоа долги редици, пренесува сдк.мк.

— реклама —

Како што пренесува сдк.мк, претпладнево беа услужувани само клиенти без платежни картички кои добиле СМС-порака, со можност да подигнат најмногу 20.000 денари. Иако беше најавена и исплата на социјална помош, средствата сè уште не беа пристигнати. Брзата помош интервенирала неколкупати поради граѓани на кои им се слошило додека чекале во метежот.

— реклама —

Дел од пензионерите бараат да им се овозможи подигнување потврди за префрлање на пензијата во друга банка. За тоа, покрај отворање нова трансакциска сметка, потребна е и потврда од Фондот за пензиско и инвалидско осигурување, каде што денеска исто така имало голем број граѓани и долги редици.

— реклама —

Дополнителен проблем за повозрасните лица и лицата со попреченост е пристапот до канцелариите на третиот кат во Фондот, бидејќи зградата нема лифт.

— реклама —

Народната банка на 1 ноември воведе привремена администрација во „Алта банка“ АД Битола, откако на матичната банка во Белград ѝ беше одземена лиценцата за работа и беше отворена стечајна постапка. Оттогаш, клиентите можат да подигнуваат најмногу 10.000 денари неделно од банкомат, додека оние без платежни картички можат да добијат до 20.000 денари на шалтер. Граѓаните сè уште немаат можност да располагаат со своите штедни влогови.