„Хипотетичко и фантастично сценарио“ – вели обвинителката за одбраната на судијата Ѓоко Ристов во предметот за парите во ѕид

Обвинителката Искра Хаџи-Василева по денешното рочиште во предметот против судијата Ѓоко Ристов изјави дека сведочењето на таткото на неговата сопруга нема доказна тежина за обвинението, додека вештачењето на пронајдените белешки отвора дополнителни прашања за доказниот материјал.

Хаџи-Василева го коментираше исказот на Ивица Зориќ, татко на сопругата на обвинетиот судија, кој пред судот сведочеше за семејниот договор за купување стан и за 70.000 евра што, според неговите тврдења, ги дал во готовина.

— реклама —

„Тој не заслужува особен коментар, од проста причина што исказот се однесува на факти кои се целосно неспорни, не се ниту директен предмет на обвинението“, изјави обвинителката.

Според неа, сведочењето главно се однесувало на семејни околности, вклучително и на наследување имиња, поради што оцени дека нема доказна ниту правна релевантност за предметот.

Обвинителката се осврна и на исказот на вештото лице кое ги анализирало рачно испишаните белешки пронајдени меѓу доказните материјали поврзани со парите.

— реклама —

Таа посочи дека, според вештачењето, белешките биле испишани од Донка Ристова, мајката на обвинетиот судија Ѓоко Ристов.

„Материјалите, ливчиња кои се дел од доказната материја, се најдени како дел од парите и придружниот материјал кон парите, а се испишани од мајката на обвинетиот Ѓоко Ристов, односно Донка Ристова“, рече Хаџи-Василева.

— реклама —

Според обвинителката, одбраната се обидела да ги поврзе белешките испишани од мајката на судијата со ДНК-материјалот пронајден на фолиите, за кој таа тврди дека му припаѓа на обвинетиот.

Хаџи-Василева оцени дека одбраната се обидува да создаде теза за можна контаминација, односно пренесување на ДНК-материјалот преку допирање на предметите.

„Веројатно спинот беше на линија на некаква контаминација, но тешко е да поверуваме дека ливчињата Донка ги допирала или ги триела од обвинетиот Ѓоко, па теоретски да дојдеме до некое хипотетичко и фантастично сценарио дека оттука доаѓа до пренос на ДНК-материјал“, изјави обвинителката.

Таа најави дека прашањата поврзани со ДНК-доказите ќе бидат дополнително разгледувани на следното рочиште, кога треба да сведочи вешто лице предложено од обвинителството.

Според Хаџи-Василева, тогаш ќе се разгледуваат и правилата за пренесување и толкување на ДНК-материјалот, кои се важни за оценување на доказите во постапката.