Амбасадорите на земјите членки на Европската Унија денеска повторно ќе се обидат да постигнат конечен договор за 21. пакет санкции против Русија. Иако по заминувањето на Виктор Орбан од власт во Унгарија се очекуваше полесен договор, неколку земји членки побараа ублажување на дел од предложените мерки за да ги заштитат сопствените економски интереси, пишува „Политико“.
Според медиумот, Грција се спротивставила на предлогот со кој на компании од ЕУ би им се забранило да превезуваат руски течен природен гас во трети земји, поради можните последици врз нејзината бродска индустрија.
Австрија, пак, за време на преговорите го покренала прашањето за обесштетување на „Рајфајзен банка“ поради имот што, според банката, бил незаконски експроприран во Русија. Европската комисија ветила дека ова прашање ќе го разгледа во некој од следните пакети санкции.
Од предлогот, исто така, е отстранета мерката за постепено укинување на увозот на руска риба, откако дел од земјите предупредиле дека тоа би можело да предизвика раст на цените и негативни последици за европската преработувачка индустрија.
Во меѓувреме, од конечната верзија на пакетот се избришани и санкциите против рускиот патријарх Кирил, по противењето на Бугарија и Италија. Франција и Италија, исто така, побарале да се ублажат ограничувањата за поранешни припадници на руските вооружени сили, наведувајќи дека механизмите за нивна проверка сè уште не се подготвени.
И покрај овие измени, пакетот предвидува исклучување на уште десетина руски банки од системот СВИФТ, како и забрана за влез во Европската Унија за повеќе од 250 лица, што претставува најголемо проширување на санкциската листа од 2023 година.
Според дипломатски извори на „Политико“, иако се очекува договорот да биде постигнат, последните отстапки покажуваат дека и без Орбан, националните интереси на земјите членки и понатаму претставуваат сериозна пречка за воведување построги економски мерки против Москва.
