Состојбата на индонезискиот остров Флорес и натаму е тешка по силниот земјотрес што го погоди регионот пред два дена. Најмалку 54 лица загинаа, 135 се повредени, а илјадници жители останаа без домови и сè уште чекаат помош, објави АП.
Многу жители трагаат по исчезнати членови на своите семејства, додека до дел од заедниците кои останале отсечени по земјотресот сè уште не стигнала помош. Според Националната агенција за управување со катастрофи, оштетени се повеќе од 1.300 домови, од кои речиси 250 на Флорес, а околу 5.000 луѓе се сместени во привремени засолништа.
Земјотресот се случил на длабочина од 10 километри, нешто пред 6 часот наутро. Жителите во паника ги напуштале домовите, а предупредувањето за цунами подоцна било повлечено. Властите досега регистрирале најмалку 995 последователни потреси, од кои 46 биле почувствувани од населението.
Илјадници луѓе минатата ноќ ја поминале на отворено, пред урнатите домови и под шаторски платна, стравувајќи од нови потреси. Патиштата се блокирани од паднати дрвја и одрони, а на повеќе места има големи карпи и целосно или тешко оштетени куќи.
„Мојата куќа сега е само куп урнатини“, изјавил трговецот Расјид Џафар од тешко погоденото село Рео. Тој вели дека на населението итно му се потребни храна, лекови и чиста вода.
Во погодените подрачја се распоредени повеќе од 3.500 припадници на армијата и полицијата, а испратени се и околу 275 тони помош. Сепак, логистичките проблеми го забавуваат доставувањето на помошта до најтешко погодените места.
Индонезија често е погодена од земјотреси и вулкански ерупции бидејќи се наоѓа во пацифичкиот „Огнен прстен“, подрачје со голема сеизмичка и вулканска активност.
