Индонезиските власти прогласија 14-дневна вонредна состојба во провинцијата Источна Нуса Тенгара по разорниот земјотрес со магнитуда од 7,7 степени што го погоди островот Флорес. Мерката ќе биде во сила до 28 август, а целта е побрзо да се спроведат спасувачките операции и да се обнови оштетената инфраструктура.
Одлуката ќе овозможи подобра координација меѓу надлежните институции, полесен пристап до погодените подрачја и побрзо ангажирање на расположливите ресурси, соопшти гувернерот на Источна Нуса Тенгара, Мелки Лака Лена.
Во акцијата ќе бидат вклучени покраинските и централните власти, армијата и полицијата, државните служби, приватниот сектор и локалните заедници.
„Безбедноста на населението и задоволувањето на основните потреби на погодените граѓани се главните приоритети“, изјави Лака Лена.
Расположливите сили и опрема ќе бидат насочени кон потрага и евакуација на населението, медицинска помош, обезбедување храна, вода и привремено сместување, транспорт, како и поправка на оштетената инфраструктура.
Бројот на загинатите во земјотресот достигна најмалку 51 лице, додека десетици се повредени. Индонезиските власти предупредуваат дека бројот на жртвите може да се зголеми бидејќи спасувачките екипи продолжуваат да ги пребаруваат урнатините.
Според властите, спасувачите досега пронашле најмалку 51 тело, главно во областите Сика, Мангарај и Источен Мангарај, додека најмалку 50 повредени лица биле пренесени во болници.
Земјотресот целосно уништил најмалку 157 куќи, а оштетил речиси 200 други. Поради разурнувањата, околу 2.000 жители биле принудени да ги напуштат своите домови и да се сместат во привремени засолништа.
Сериозно е оштетена и јавната инфраструктура. Погодени се 87 образовни установи, 18 здравствени објекти, пет верски објекти, шест владини канцеларии и други јавни објекти.
