Спасувачките екипи во источна Индонезија продолжуваат со расчистување на урнатините и потрагата по исчезнати по разорниот земјотрес со јачина од 7,7 степени. Бројот на загинати достигна 51, а повеќе од 100 лица се повредени.
Земјотресот го погоди регионот Флорес рано наутро, на длабочина од околу 10 километри, според податоците на Американскиот геолошки институт. По силниот потрес биле издадени предупредувања за цунами, кои подоцна биле повлечени. Индонезиските власти регистрирале најмалку 235 последователни потреси.
Спасувачите во неделата продолжиле да копаат низ урнатините во шест области на Флорес, каде што земјотресот предизвикал и големи свлечишта. Поради нив биле блокирани делови од патот Транс-Флорес, долг околу 700 километри, кој поврзува бројни населени места на островот.
Според Националната агенција за пребарување и спасување, 101 лице е повредено, уништени се повеќе од 900 куќи, а уште околу 450 се оштетени. Околу 5.000 жители биле принудени да ги напуштат своите домови и да се сместат во привремени засолништа.
„Го расчистивме најголемиот дел од свлечиштата и повторно ги отворивме патиштата кон претходно изолираните села, иако прекините во комуникациите и снабдувањето со електрична енергија сè уште ја отежнуваат потрагата по исчезнатите“, изјави Фатур Рахман, шеф на локалната канцеларија за пребарување и спасување.
Властите доставуваат ориз, готова храна, вода за пиење, ќебиња и лекови, а се подготвуваат и дополнителни центри за итно сместување. Како главни предизвици остануваат обновувањето на електричната енергија и комуникациските врски, како и доставувањето помош до оддалечените села кои се дополнително изолирани поради свлечиштата.
Индонезија често е погодена од земјотреси и вулканска активност поради нејзината положба на таканаречениот Пацифички огнен прстен. Флорес беше погоден од силен земјотрес и цунами и во 1992 година, кога загинаа околу 2.500 луѓе. Во 2018 година, земјотрес со јачина од 7,5 степени предизвика разорно цунами и однесе повеќе од 4.400 животи, додека земјотресот кај Суматра во 2004 година предизвика едно од најсмртоносните цунами во историјата, со околу 230.000 жртви во 12 земји.
