Министерството за транспорт го презема проектот за санација на свлечиштето на патот кон Тефериџ во Општина Кисела Вода, а тендерот за избор на изведувач се очекува да биде објавен следната недела, најави заменик-претседателот на Владата и министер за транспорт Александар Николоски.
Тој истакна дека станува збор за сериозно свлечиште чија санација ги надминува финансиските и техничките можности на Општина Кисела Вода и на Град Скопје.
„Премиерот Христијан Мицкоски организираше координациска средба меѓу Владата, Општината и Градот Скопје. На владината седница во вторник беше донесена одлука Министерството за транспорт да го преземе целиот проект“, изјави Николоски.
Тој посочи дека веќе е изготвен проект за стабилизација и санација на свлечиштето и дека веднаш по објавувањето на тендерот ќе следува избор на изведувач.
Според Николоски, изборот на изведувач се очекува да заврши за околу еден до еден и пол месец, по што ќе започнат градежните работи.
Министерот изрази очекување санацијата да биде завршена пред почетокот на зимата, при што нагласи дека Владата, преку Министерството за транспорт, целосно ја презема реализацијата на проектот.
