Министерството за здравство анализира пријави и информации за можни неправилности во функционирањето на листите на чекање, а министерот Азир Алиу вели дека постојат индиции за злоупотреби, но засега тие не се доволно документирани за јавно да се презентираат како потврдени случаи.
„Има случаи кога пациент со карцином бил вратен од операција со образложение дека крвната слика не му е доволно добра, а потоа, по направени анализи во друга лабораторија, резултатите покажале дека сè е во ред. Ги анализираме ваквите случаи и работиме на детектирање на можни злоупотреби“, рече Алиу.
Тој посочи дека листите на чекање мора да се ажурираат, бидејќи во нив сè уште се евидентирани и пациенти кои во меѓувреме починале.
„Тоа не може да го прави само Министерството. Законски, процесот мора да се спроведува заедно со здравствените установи, па затоа испраќаме и наши вработени на терен за физички да се изврши ажурирањето“, додаде министерот.
Алиу информираше и дека системот за евиденција со отпечаток од прст е во пилот-фаза и веќе функционира во Министерството за здравство, како и на Клиниката за инфективни болести, Торакална хирургија и Трансфузиологија во Клиничкиот центар „Мајка Тереза“.
Според него, системот ќе овозможи прецизна евиденција на работното време и ќе придонесе за поголема правичност меѓу вработените.
Министерот најави и дополнителни анализи за да се утврди дали и во колкав обем пациенти од јавните здравствени установи се пренасочуваат кон приватниот сектор.
„Сè уште е рано да зборуваме за резултати, но административните механизми веќе се воспоставуваат“, истакна Алиу.
Потсетувајќи дека од февруари е во функција електронскиот систем за следење на елективните хируршки интервенции, министерот нагласи дека целта е пациентите да бидат третирани по принципот „прв дојден, прв услужен“ и да се обезбеди поголема транспарентност во работењето на здравствениот систем.
