ПРЕДМЕТИ

Брутална тепачка во Виница: човек во кома, за тепачот се бара притвор

Основното јавно обвинителство Кочани донесе Наредба за спроведување истражна постапка против едно лице од Виница за кривично дело – Тешка телесна повреда од член 131 став 3 во врска со став 1 од Кривичниот законик.„Осомничениот 37-годишник, на 2 октомври, на паркинг простор пред ресторан во Виница, со умисла тешко телесно повредил едно лице и му го довел во опасност животот. Откако започнал вербална расправија со оштетениот во ресторанот, осомничениот пред објектот најпрво го фатил оштетениот за јакната и му задал повеќе удари со тупаници во стомакот. Потоа продолжиле да се туркаат и да се удираат со камења.Присутни лица се обиделе да ги раздвојат, но во еден момент осомничениот со камен го удрил оштетениот во задниот дел од главата и тој од ударот паднал во бесознание. Му била нанесена тешка телесна повреда – скршеница на черепот на главата, поради која оштетениот се наоѓа во кома и е неконтактибилен, а животот му е доведен во опасност. Јавниот обвинител, веднаш по настанот, достави предлог до Судот со кој лицето беше обезбедено со мерка притвор во траење од два пати по 48 часа со цел да се обезбедат сите потребни докази особено во поглед на здравствената состојба на оштетениот.Во текот на денешниот ден, веднаш по формалното отворање на истрагата, надлежниот јавен обвинител до Судот достави предлог за определување редовен притвор во траење од 30 дена“, велат од Обвинителството.

Македонија | пред 5 месеци

Запрени во „БМВ“, фатени со кокаин: бркотница на полицајци со дилери на дрога на автопатот Тетово-Гостивар

Основното јавно обвинителство Тетово донесе Наредба за спроведување истражна постапка против двајца жители на Брвеница, за кои постои сомнение дека биле соизвршители во кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.„На 4 октомври, околу 2 часот по полноќ, осомничените пренесувале вкупно 110,31 грама наркотична дрога кокаин. Нивниот автомобил БМВ полицијата го забележала на автопатот Тетово-Гостивар, во непосредна близина на клучката за Брвеница, и бидејќи се движеле нестабилно, со цик цак движења, полициските службеници им дале сигнал да застанат. Кога подзапреле, едниот осомничен се обидел од под совозачкото седиште да исфрли ќеса со дрога, но полицајците го спречиле во намерата. Освен дрогата, кај осомничените била пронајдена и дигитална вага со траги од кокаин и поголема сума парични средства, односно 206 000 денари и 1150 евра во различни апоени, кои поради сомнение дека потекнуваат од илегална продажба на дрога привремено се одземени.Јавниот обвинител до судијата на претходна постапка од Основниот суд во Тетово поднесе предлог за определување мерка притвор за едниот осомничен, додека за другиот се предложени мерки на претпазливост“, велат од Обвинителството.

Македонија | пред 5 месеци

Купил пиштол од Скопје, го викнал на кафе и го убил во Штип - планот го знаеле уште три лица ама не реагирале - поднесено обвинение за убиството

Основното јавно обвинителство Штип поднесе обвинителен акт против пет турски државјани осомничени за убиството на Енес Оздемир, кое се случи во мај годинава.Еден од нив се товари за директно извршување на кривичното дело „убиство“ и за неовластено поседување оружје, додека тројца обвинети ќе одговараат за помагање при извршување на делото. Петтата обвинета, пак, се товари за помагање на сторителот по извршување на тешкото кривично дело.Според обвинението, првообвинетиот, 21-годишен турски државјанин без регулиран престој во Македонија, на почетокот на мај во Скопје нелегално купил полуавтоматски пиштол марка „FEG“, калибар 9 мм, со избришани ознаки. На 8 мај преку мобилна апликација се договорил да се сретне со жртвата во кафе-бар во центарот на Штип. По краток разговор, обвинетиот извадил пиштол и испукал неколку куршуми, нанесувајќи му шест прострелни повреди на Оздемир, од кои починал.Тројцата сообвинети, иако знаеле за намерата на извршителот, му обезбедиле сместување, логистика и превоз до Штип, а му помогнале и во набавката на оружјето. По убиството, сите заедно се обиделе да се вратат во Скопје, при што петтата обвинета со свој автомобил се обидела да му овозможи бегство на убијцата, кој излегол од возилото пред патарината „Миладиновци“. Таму подоцна бил фатен и приведен од полицијата. Останатите четворица биле запрени на патарината и лишени од слобода.Обвинителството побара продолжување на мерката притвор за четворица обвинети, додека за петтата остануваат претходно определените мерки на претпазливост.

Македонија | пред 5 месеци

Жена во Ѓорче изгубила свест од удари и давење - нови два случаи на ужасно семејно насилство

Основното јавно обвинителство Скопје поведе постапка против две лица за кривично дело „Телесна повреда“ по член 130 став 2 во врска со став 1 од Кривичниот законик, во два одделни случаи на семејно насилство.Во првиот случај, на 25 септември во семеен дом во Ѓорче Петров, осомничениот физички ја нападнал својата вонбрачна партнерка. Според обвинителството, тој ја удирал со тупаници, шлаканици и клоци во пределот на главата и телото, а во еден момент почнал и да ја дави. Жената изгубила свест, а притоа ѝ биле нанесени повеќе телесни повреди.Вториот случај се случил на 1 октомври во селото Мирковци. Таму, друг осомничен отишол во домот на својата поранешна брачна партнерка и иако таа побарала да си замине, тој одбил и почнал да ја напаѓа. Според пријавата, ја влечел и тегнел за рацете, удирал со тупаници, при што жената добила видливи повреди.Јавниот обвинител побарал од судијата на претходна постапка да им биде изречена мерка притвор за двајцата осомничени, поради околности кои укажуваат на опасност од бегство.

Скопје | пред 5 месеци

Закани преку телефон и апликации за пари: приведен скопјанец пред Онкологија, фатен како сака да земе изнудени пари

Јавен обвинител од Основното јавно обвинителство Скопје донесе Наредба за спроведување истражна постапка против 37-годишен осомничен, за кој постои основано сомнение дека извршил кривично дело „Изнуда“ од член 258 став 1 од Кривичниот законик.Во изминатите два месеца, осомничениот телефонски и преку пораки на различни апликации упатувал сериозни закани кон жена која живее во странство, како и кон нејзината мајка и брат. Од оштетената барал да му исплати 15.000 евра, а ѝ дал рок до 26 септември.Под закана, оштетената на 17 септември му испратила 500 евра преку „Вестерн унион“, а за дополнителни 4.500 евра се договориле исплатата да биде извршена во земјава, пред Клиниката за онкологија.Кога оштетената пристигнала во Македонија на 25 септември, веднаш случајот го пријавила во полиција. При преземање на парите, осомничениот бил приведен на лице место.Имајќи ја предвид опасноста од бегство, можноста за влијание врз сведоците и оштетената, како и ризикот да го повтори делото, јавниот обвинител предложи мерка притвор.

Скопје | пред 6 месеци

Притвор за осомничен од Страчинци: му влегле дома и му нашле 99 исушени гранки билка и 41 грам марухуана

Основното јавно обвинителство Скопје донесе наредба за спроведување истражна постапка против 50-годишен жител на селото Страчинци, осомничен за кривично дело „Неовластено производство и пуштање во промет наркотични дроги, психотропни супстанции и прекурсори“ по член 215 став 1 од Кривичниот законик.При претрес во неговиот дом, полициските службеници пронашле три откорнати растенија канабис, 99 пресечени, превиткани и исушени гранчиња од истата билка, како и 41,4 грама марихуана спакувана за понатамошна употреба.Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот, со цел да се обезбеди неговото присуство и непречено водење на истрагата.

Скопје | пред 6 месеци

„Казната е подбив, наместо правда, добивме минимизирање на трагедијата“, потврдена казната од две години на возачот кој ја усмрти Теодора

Семејството на Теодора Ристовска, која беше усмртена на пешачки премин во сообраќајна несреќа во Тетово, остро реагира на одлуката на Апелациониот суд во Гостивар со која е потврдена пресудата на Основниот суд во Тетово. Обвинетиот Менсур Пајазити од селото Голема Речица е прогласен за виновен и осуден на две години затвор.„Оваа пресуда е срам за правдата. Животот на Теодора згасна, а казната изгледа како подбив. Наместо вистинска правда, добивме минимализирање на трагедијата која нè скрши“, изјави нејзината сестра Ева Ристовска.Семејството обвинува дека со „блага и селективна казна“ судството создава уште поголема недоверба кај граѓаните.„Кога казната е непропорционална со загубата, виновен станува не само сторителот, туку и самиот систем“, велат во обраќањето.Тие нагласуваат дека осудениот повторно управува возило, без чувство на вина, што го сметаат за навреда за сеќавањето на Теодора.„Кога убиецот шета слободен, целата нација е жртва“, порачува семејството.Иако понатамошниот правен пат зависи од Јавното обвинителство и можноста предметот да заврши пред Врховниот суд, семејството Ристовска најави дека нема да замолчи и ќе продолжи да бара одговорност.„Правдата мора да биде видлива, опиплива и вистинска. Животот на Теодора не е бројка во досие — тоа е нашата вечна рана. И нема да престанеме да бараме правда, за да покажеме дека жртвите не се оставени сами“, стои во реакцијата на семејството.

Македонија | пред 6 месеци

Обвинителството повторно побара обдукција на телото на починатото девојче во тетовската болница

Јавен обвинител од Основното јавно обвинителство Тетово повторно издаде наредба за извршување на судско-медицинска обдукција на телото на седумгодишното девојче од селото Челопек, кое на 20 септември почина за време на лекување во Клиничката болница во Тетово, а за кое родителите не дозволуваат да се изврши обдукција.Според обвинителството, обдукцијата е неопходна за целосно да се расветлат околностите околу смртта на детето.Од Клиничката болница Тетово претходно информираа дека веднаш по приемот на пациентката биле преземени сите неопходни медицински мерки, но и покрај напорите на лекарите девојчето починало.

Македонија | пред 6 месеци

Почина седумгодишно девојче од Челопек за време на лекување во тетовската болница

Седумгодишно девојче од тетовското село Челопек почина за време на болничко лекување во Клиничката болница Тетово, информираат од установата.Од болницата соопштија дека пациентката била примена на Одделението за педијатрија во саботата, на 20 септември, во 20:40 часот.„Веднаш беа преземени сите неопходни мерки согласно важечките медицински протоколи со цел поставување на точна дијагноза. Од моментот на приемот, беа преземени сите потребни медицински мерки соодветни на нејзината здравствена состојба, вклучително и интензивна рехидратација, согласно професионалните и клинички насоки“, наведуваат од болницата.Во текот на третманот била побарана интервенција од Одделението за оториноларингологија (ОРЛ). „Била побарана помош од ОРЛ за аспирација на секрети од усната шуплина. За жал, за време на интервенцијата, пациентката не покажа знаци на реакција, по што беше итно префрлена на Одделението за анестезија, реанимација и интензивна нега, каде што беа преземени сите мерки за реанимација. И покрај максималните напори на медицинскиот тим, пациентката почина“, стои во соопштението.Клиничката болница информира дека побарала да биде извршена судско-медицинска обдукција за целосно расветлување на случајот. „Сепак, до овој момент, семејството на пациентката го изрази своето противење за спроведување на обдукцијата. Изразуваме искрено сочувство и длабока тага до семејството во овие исклучително тешки и трагични моменти“, додаваат од установата.Од болницата нагласуваат дека се подготвени целосно да соработуваат со надлежните институции за секое дополнително појаснување во врска со овој случај.

Македонија | пред 6 месеци

Рекетиран градоначалникот на Неготино: Анонимен профил му се заканувал на градоначалникот на Неготино барајќи 3.000 евра

Основното јавно обвинителство Кавадарци поведе истражна постапка против едно лице од Неготино за кривично дело – Изнуда од член 258 став 1 во врска со член 19 (во обид), како и Загрозување на сигурноста од член 144 став 4 во врска со став 2 и став 1 од Кривичниот законик.Осомничениот ги извршил кривичните дела спрема градоначалникот на Неготино. На 2 септември, од анонимен фејсбук профил му испратил порака со сериозни закани кон него и неговото семејство, обидувајќи се да го присили да му исплати 3.000 евра.Во периодот од 4 до 18 септември, во неколку наврати, осомничениот испраќал пораки со смртни закани и на официјалната електронска пошта на Општината. Со тоа, кај оштетениот и неговото семејство предизвикал чувство на несигурност, загрозување и страв.Бидејќи постои опасност од бегство и можност осомничениот да го повтори делото, јавниот обвинител до судијата на претходна постапка доставил предлог за определување мерка притвор.

Македонија | пред 6 месеци

Фрлена бомба во Битола – оштетени седум возила, за четворица осомничени се бара притвор

Основното јавно обвинителство Битола поведе постапка против четири лица за кривично дело Предизвикување општа опасност по член 288 став 1 од Кривичниот законик, поради сомнение дека заеднички подметнале експлозивна направа пред една куќа во градот.Според прибраните докази во предистрагата, на 12 јули годинава осомничените активирале и фрлиле рачна бомба М-75 кон куќа на улицата „Охридска“. Од експлозијата биле оштетени седум паркирани возила, а била предизвикана и сериозна опасност по животот и телото на граѓаните во централното градско подрачје.Двајца од осомничените со моторцикл директно учествувале во подметнувањето на експлозивот, додека другите двајца имале соизвршителски дејствија со кои овозможиле и придонеле за извршување на делото.Јавниот обвинител до судијата на претходна постапка од Основниот суд во Битола поднесе предлог за определување мерка притвор за сите четворица осомничени, од кои еден во моментов е недостапен за органите на прогонот.

Македонија | пред 6 месеци

Закани со убиство и палење куќа за 1.000 евра: три апсења за изнуда правена во Скопје

Основното јавно обвинителство Скопје отвори истрага против тројца осомничени за кривично дело изнуда, по член 258 од Кривичниот законик.Според обвинителството, во периодот од 16 до 18 септември, првоосомничениот, претставувајќи се како припадник на криминална група, со сериозни закани присилил оштетено лице да му исплати 60.000 денари. Од него побарал 1.000 евра со образложение дека ќе го „заштити“ од други луѓе кои наводно претходно му барале пари, заканувајќи се дека ќе го убие и ќе му ја запали куќата ако пријави во полиција.Оштетениот првиот ден предал 30.000 денари, откако толку можел да подигне од банкомат, но потоа сепак пријавил во полиција. Два дена подоцна, при договор за предавање на остатокот од парите, банкнотите биле крим-технички обработени. Веднаш по примопредавањето, осомничениот бил уапсен на лице место, а кај него биле пронајдени парите.Истрагата опфаќа уште две лица за кои постои сомнение дека во август и септември, во повеќе наврати изнудувале пари од истото лице. Тие го убедувале дека парите се наменети за други лица за да му го заштитат семејството, со што оштетениот бил присилен да исплати вкупно 27.000 евра.Обвинителството до судијата на претходна постапка поднесе предлог за притвор на првоосомничениот, кој беше фатен на лице место, додека за другите двајца побара мерки на претпазливост – задолжително јавување во суд и забрана за приближување до оштетениот и неговото семејство.

Скопје | пред 6 месеци

Струга: Расправија прераснала во пукање и физички напад – повредени граѓанин и полицаец

Основното јавно обвинителство Струга отвори истрага против 34-годишен жител на селото Велешта, осомничен за неовластено изработување, држење, посредување и тргување со оружје или експлозивни материи, предизвикување општа опасност и напад врз службено лице при вршење работи на безбедноста.Инцидентот се случил пред три дена )16 септември), кога осомничениот, за време на расправија со тројца жители на Дебар со кои имал претходно нарушени односи, извадил пиштол кој незаконски го поседувал и испукал неколку куршуми кон едно лице, погодувајќи го во долниот дел од нозете. Оштетениот задобил две лесни телесни повреди.По пукањето, осомничениот се обидел да избега со возило. Иако полициски службеник му наредил да застане, тој не ја послушал наредбата и движејќи се наназад го удрил полицаецот, нанесувајќи му телесна повреда.При увидот, во возилото биле пронајдени и нож и метална шипка, поради што ќе се вршат дополнителни проверки за нивната можна употреба во настанот.Јавниот обвинител до Основниот кривичен суд доставил предлог за определување мерка притвор за осомничениот.

Македонија | пред 6 месеци

По утринските апсења: Истрага за 15 лица, меѓу нив полицајци, директор, началник

Специјализираното одделение при Основното јавно обвинителство за гонење кривични дела сторени од лица со полициски овластувања и припадници на затворската полиција поведе истражна постапка против 15 лица, осомничени за повеќе тешки кривични дела поврзани со нелегална сеча на шума во Малешевијата.Тие се товарат за злосторничко здружување и пустошење шуми, шестмина и за злоупотреба на службена положба, додека првоосомничениот е обвинет и за давање поткуп, а еден од осомничените за примање поткуп.Според обвинителството, во 2025 година двајца вработени во приватна фирма и полициски службеник формирале група со цел противправна заработка преку злоупотреба на овластувањата, корупција и нелегална сеча на дрвна маса. Во групата биле вклучени и лица вработени во МВР, ЈП „Национални шуми“ – подружница Малешево, Министерството за земјоделство, шумарство и водостопанство, како и невработени лица.Во периодот на делувањето, била опустошена шума на површина од 6.000 хектари, при што биле исечени 1,5 милиони кубни метри дрвна маса со вредност од над 6,4 милијарди денари. Дрвото било транспортирано и продавано како легално исечено.Обвинителството посочува дека полициски службеници ја поддржувале групата со тоа што не преземале мерки и ги информирале организаторите за полициските патроли. Директорот на ЈП „Национални шуми“ – ПО Малешево давал одобрение за нелегалната сеча, а началникот на ОВР Делчево ги прикривал сторителите и средствата користени за извршување на делата.Првосомничениот, во август и септември 2025 година, му дал поткуп од 6.100 евра на директорот на шумското претпријатие за да дозволи нелегална сеча, пред официјалниот јавен повик за експлоатација на опожарена дрвна маса.Обвинителството открива и дека вчера началник од полицијата предупредил член на групата дека претстои акција, кој пак ја пренел информацијата до организаторот. Организаторот им наредил на работниците да ги сокријат трагите, но при обид за „чистење“ на теренот бил фатен на лице место.Ценејќи дека постои опасност од бегство и влијание врз истрагата, јавниот обвинител до Основниот кривичен суд Скопје доставил предлог за определување притвор за сите 15 осомничени.

Македонија | пред 6 месеци

Четворица обвинети за кражба и сквернавење на гроб на Бутелските гробишта, краделе бронзена биста од гробот на Стале и Бранка Попови

Основното јавно обвинителство Скопје поведе постапка против четири лица осомничени за тешка кражба и сквернавење гроб, кривични дела казниви по член 236 и член 400 од Кривичниот законик.Според обвинителството, осомничените на 17 септември влегле на градските гробишта во Бутел и дошле до алејата на заслужни граѓани. Со употреба на сила ја откорнале и урнале бронзената биста со два човечки лика во седечка положба, поставена на гробот на починатите Стале Попов и Бранка Поповска.Иако бистата била зацврстена со анкери, тие ја разурнале и ја оштетиле платформата на гробното место, со што го осквернавиле гробот. Потоа бистата ја влечеле до жичаната ограда каде претходно направиле отвор, преку кој ја изнеле и ја натовариле во автомобил со намера да ја присвојат.Проценетата вредност на бистата, која е во сопственост на наследничка на починатите, изнесува околу 320.000 денари.Поради тежината на делото и опасноста од бегство, јавниот обвинител до Основниот кривичен суд Скопје доставил предлог за определување притвор за сите четворица осомничени.

Скопје | пред 6 месеци

„Ќе бидеш моја или ќе бидеш мртва“ – последното сведоштво на Росица за убиецот Илија, шест дена пред да биде убиена

За закани, киднапирање и тепање кои се случиле последните денови од 2024 година, сега убиената Росица Коцева, била повикана во Обвинителство пет дена пред да биде убиена, за да даде исказ. И таму кажала, дека убиецот Илија Стефановски, и се заканувал со зборовите „ќе бидеш моја или ќе бидеш мртва“. Сепак, Обвинителството не побарало притвор или построги мерки за обезбедување присуство, освен веќе изречената забрана за приближување, која не била испочитувана, а обвинител од Велес бил запознаен за ова уште во мај годинава.Ова е целиот исказ на Росица Коцева, даден пред Обвинителството:„Јас и сегапријавениот Илија бевме во вонбрачна заедница скоро три години, но од октомври месец 2024 година таквата заедница прекина и јас се вратив повторно да живеам во Велес, сепак декември месец 2024 година и покрај тоа што бевме разделени со пријавениот имавме повремена комуникација, па така истиот на 27.12.2024 година ме повика заедно со него да одиме до Софија, Република Бугарија, со оглед дека на истиот му беше потребна помош, а со оглед дека јас добро го владеам бугарскиот јазик, прифатив заедно да појдам со него и да му помогнам во неговите обврски. По завршување на обврските во Софија на враќање кон Скопје во еден момент настана кавга помеѓу нас, бидејќи пријавениот сакаше повторно да ја обновиме нашата врска, но од моја страна имаше негодување од таквото негово барање, при што во еден момент ми доба и ми се закани со зборовите „ќе бидеш моја или ќе бидеш мртва“.По ова продолживме на пат кон Скопје и притоа додека си идевме истиот побара од мене да ја поминам ноќта кај негео во Скопје, на што од моја страна му беше одговорено дека би останала само доколку истиот ја повика неговата мајка или пак доколку таа не може да одиме во мојот дом во Велес, и да преспиеме кај мојот татко, сепак, веднаш штом пристигнавме во Скопје, поточно во Ѓорче Петров каде што илија живее, истиот ја повика неговата мајка, но и во истиот момент почна со малтретирање кон мене, при што истиот ме удираше по целото тело, ме закличи во неговиот дом, но не можам да се сетам колку време бев затворена, со оглед да немав ни телефон со мене, ни саат за да можам да се ориентирам колку време сум затворена. Исто така тој почна насилно да се однесува и кон својата мајка, така што физички ја отргнуваше, а од моја страна истата беше молена да повика полциија, но и нејзиниот телефон беше одземен од негова страна, така што истата беше спречена да повика помош.Следниот ден некаде после  пладне, по краток разговор со Илија дека доколку ме пушти дека ќе одиме, ќе побараме помош за да ни успее врската, по што исиот се сложи да ме пушти. Со оглед дека бев истрауматизирана од ваквиот настан, истиот од моја страна по два три дена беше пријавен најпрво во ПС Ѓорче Петров, а оттаму бев препратена и до ПС Кисела Вода, каде го пријавив конкретниот настан, а исто така со оглед на траумите и повредите кои ги имав, по неколку дена од настанот се јавив и на Ургентен центар во Велес“.Обвинителството не гледа вина во своето постапување. Росица беше убиена во Велес, заедно со нејзиниот татко.

Македонија | пред 6 месеци

Обвинителството водело постапки против Илија Стефановски, убиецот на Росица и нејзиниот татко: имал условна казна, мерка за забрана и повеќе пријави за насилство

Основното јавно обвинителство Велес потврди дека против Илија Стефановски, осомничен за убиството на Росица Коцева (31) и нејзиниот татко Киро Коцев (68) во Велес, уште од почетокот на годината биле поведени неколку постапки за закани и насилство.„Основното јавно обвинителство Велес на 10.04.2025 година против осомничениот поднесе Обвинителен предлог за 2 настани:- Загрозување на сигурноста од член 144 ст.3 вв ст.1 за настан на 20.02.2025 година- Насилство од чл. 386 ст.3 вв ст.1 за настан ноќта меѓу 03.03.2025 и 04.03.2025 година со нанесена полесна телесна повреда на партнер на оштетената.Во рамките на оваа постапка, ОЈО Велес нареди и психијатриско вештачење на обвинетиот, а вештото лице се произнесе дека тој не боледува од душевна болест, бил пресметлив во моментот на сторување на делото, бил способен да го сфати значењето на своите постапки и кај него не е регистрирана патолошка опсесивност или патолошка фиксација кон оштетената.На 10.09.2025 година, Основниот суд во Велес, постапувајќи по ова обвинение изрече пресуда со која обвинетиот го огласи за виновен и му изрече алтернативна мерка – условна осуда. Притоа со решение му беа укинати другите мерки на претпазливост кои беа на сила во текот на постапката, но на сила до правосилноста на пресудата остана мерката – забрана за приближување и воспоставување контакти со оштетената и нејзиниот партнер, определена по барање на обвинителството.Оваа одлука на судот во Велес само што е примена во ОЈО Велес и обвинителството се уште немаше можност да се произнесе по неа со евентуална жалба.Во меѓувреме, на 21.05.2025 година оштетената го пријавува обвинетиот во ОЈО Велес и за неизвршување на судска одлука, бидејќи и покрај дополнителните мерки за заштита од семејно насилство изречени и во граѓанска постапка, тој не ги почитува и продолжува да и испраќа пораки и фотографии со обид да оствари комуникација со неа, а на 18.05 се приближил до нејзиниот дом и го одзел и го запалил автомобилот во сопственост на нејзиниот татко. По оваа пријава, ОЈО Велес ја испита оштетената и на 26.06.2025 година издаде наредба до МВР за обезбедување докази од телефонската комуникација, како и 4 наредби за обезбедување снимки од видео надзор од различни локации во градот. По овие наредби МВР постапува.На 25.03.2025 година оштетената го пријавува осомничениот во ОЈО Скопје за настан случен на 27.12.2024 година, кога за време и по враќање од патување во Р. Бугарија, осомничениот се обидел да ја задржи во стан во Скопје и и нанел лесна телесна повреда од чл.130 ст.2 од Кривичниот законик. Според наводите од пријавата, оштетената извесен период претходно пријавила и во МВР. Речиси истовремено, и пријавениот поднесува пријава до ОЈО Скопје со која ја товари оштетената дека му поднесува лажни пријави во МВР со цел да му изнуди пари.Иако настанот во обвинителството беше пријавен три месеци по случување, ОЈО Скопје ја прибави медицинската документација, како и другите докази за целосно испитување на настанот. Врз основа на тоа, обвинителството ја отфрли кривичната пријава за лажно пријавување поднесена од Стефановски, а по пријавата поднесена од Коцева продолжи да постапува. На 09.09.2025 година, оштетената даде исказ во ОЈО Скопје и се изјасни дека останува на предлогот за кривично гонење на осомничениот“, велат од Обвинителството.

Македонија | пред 6 месеци

Се проверува одговорноста на тие кои издале дозвола да има склад за отпад во Трубарево, среде населено место

Основното јавно обвинителство потврди дека се истражува потенцијалната одговорност и на други лица во врска со големиот пожар во складиштето за отпад во Трубарево. Дозволата ја издава Министерството за животна средина, па оттука, документацијата за работата на компанијата се наоѓа во нивните простории.„Се испитува потенцијална одговорност и на други лица. Во врска со документацијата и дозволите, издадени се повеќе наредби по кои МВР сè уште постапува“, велат од Обвинителството, одговарајќи на прашањето дали лицето кое ја издало и потпишало дозволата за работа на складиштето ќе биде предмет на истрага.Веќе е познато дека тие имале 10 годишна дозвола, издадена во 2021 година, кога министеруваше Насер Нуредини од ДУИ. Складиштето работело и во време на министерувањето на Каја Шукова и Изет Меџити. Засега не е познато дали се правени контроли, во делот на исполнувањето на условите за работа.На прашањето дали се проверува колкава количина отпад била складирана во магацинот на фирмата „Ф-групација“, од Обвинителството додаваат: „Се преземаат дејствија за проверки“.Со тоа останува отворено прашањето дали фирмата поседувала отпад во рамките на дозволените параметри и дали институциите вршеле навремени контроли на работењето.

Скопје | пред 6 месеци

Пратеникот Јанчев од Левица осомничен за сообраќајна несреќа со тешко повредени малолетници: свртел лево, без да се увери дека е безбедно

Основното јавно обвинителство Скопје соопшти дека повело постапка против пратеникот на Левица, Сашко Јанчев, кој е осомничен за сторување на кривично дело „Тешки дела против безбедноста на луѓето и имотот во сообраќајот“ по член 300 став 3, во врска со член 297 став 3 и став 1 од Кривичниот законик.Според обвинителството, околу еден часот по полноќ во селото Марино, Јанчев управувал автомобил „Хјундаи тусон“ со гевгелиски регистарски ознаки спротивно на правилата за безбедност. Тој најпрво преминал на левата страна од коловозот, а потоа нагло свртел десно без да се увери дека тоа може да го направи безбедно. Во тој момент во десниот страничен дел од возилото удрил мопед „Јијинг“ без регистарски ознаки, управуван од 16-годишен малолетник.Од ударот, возачот на мопедот и неговата 13-годишна сопатничка, кои не носеле заштитни кациги, се здобиле со тешки телесни повреди. Полесни повреди добил и сопатникот во автомобилот на Јанчев.Извршените анализи покажале дека ниту кај Јанчев, ниту кај малолетниот возач на мопедот не е утврдено присуство на алкохол или други психоактивни супстанции. Автомобилот и мопедот се одземени и ќе бидат подложени на вонреден технички преглед, а ќе биде извршено и сообраќајно вештачење.Јавниот обвинител, земајќи ги предвид сите околности, предложил на осомничениот да му се изречат мерки на претпазливост – привремено одземање на патната исправа и возачката дозвола – со цел да се обезбеди негово присуство и непречено водење на постапката.

Скопје | пред 6 месеци

Побаран краткотраен притвор за 4 лица во врска со пожарот во Трубарево

„Поради основано сомнение дека со заеднички дејствија учествувале во извршување на кривично дело – Загрозување на животната средина и природата со отпад од член 230 став 2 во врска со став 1 од Кривичниот законик, Основното јавно обвинителство Скопје поведе постапка против 4 лица за кои од судија на претходна постапка вечерва ќе побара определување мерка краткотраен 48-часовен притвор за обезбедување докази.Нивните конкретни дејствија се испитуваат, но станува збор за 56-годишен управител и сопственик на 2 правни лица, 22-годишна управителка на трето правно лице, 42-годишник во својство раководител на подружница и еден 59-годишник вработен во правно лице. Се испитува потенцијална одговорност и на други лица.Во текот на денот, јавниот обвинител издаде повеќе наредби за обезбедување докази по кои се уште постапуваат надлежните органи, а се очекуваат и резултатите од извршените мерења на загадувањето од Министерството за животна средина“, велат од Обвинителството.

Македонија | пред 6 месеци

Нема фотографија

Нови детали: Кавадарчанецот пред казино е убиен со клоци и боксови по глава, се обидел да се скрие внатре, но починал

Основното јавно обвинителство Кавадарци донесе Наредба за спроведување истражна постапка против три лица за убиството пред казино во истиот град. Тие се осомничени дека како соизвршители сториле кривично дело „Тешка телесна повреда со смртни последици“.Според обвинителството, двајца 27-годишници и еден 35-годишник на 27 август, околу 5 часот наутро, најпрво влегле во вербална расправија со жртвата во казино во Кавадарци. Набргу потоа излегле надвор, каде физички го нападнале оштетениот, удирајќи го со тупаници и клоци по телото и главата. Жртвата се обидел повторно да влезе во казиното, но изгубил свест. Од нанесените тешки повреди подоцна починал.Нема информации за мотивот, иако се шпекулира дека стнаува збор за финансиски обврски кои ги имале убиениот со другите лица.Во рамките на истражната постапка ќе бидат прибрани сите докази и ќе се изврши психијатриско вештачење на осомничените. Доколку се утврди дека постоела свест и намера да му го одземат животот на оштетениот, делото може да биде преквалификувано во убиство.Јавниот обвинител до судијата на претходна постапка поднесе предлог за определување мерка притвор за тројцата осомничени. Како причина беше наведена опасноста од бегство, а на тоа укажува и нивното однесување веднаш по нападот – наместо да се пријават во полиција, тие се повлекле во стан на еден од осомничените. Обвинителството оцени дека притворот е неопходен за непречено водење на постапката и за обезбедување на сите релевантни докази.

Македонија | пред 7 месеци

Се претставувал како министер и обвинител и земал 1,5 милион денари - нова истрага за измама во Скопје

Јавното обвинителство Скопје поведе истрага против едно лице поради сомнение за продолжено кривично дело „Изнуда“. Осомничениот, во периодот од 15 до 28 јули 2025 година, успеал да извлече околу 1,5 милион денари од едно лице, претставувајќи се како министер за внатрешни работи и тројца јавни обвинители.Според истрагата, осомничениот со сериозна закана уверувал дека против оштетениот ќе биде поведена судска постапка доколку не ја исплати бараната сума. Тој во повеќе наврати се јавувал од различни телефонски броеви и барал парични средства со ветување дека оштетениот ќе биде изземен од обвинение.Оштетеното лице, исплашено од заканите, во четири наврати на различни локации во Скопје му предало на осомничениот вкупно околу 1,5 милион денари.По преземени мерки, Обвинителството заклучи дека се работи за изнуда, а не за измама, бидејќи биле користени закани и притисоци за да се нанесе имотна штета. За делото е предвидена затворска казна од најмалку една година, со можност и за изрекување законски максимум.До Основниот кривичен суд Скопје е доставен предлог за определување мерка притвор за осомничениот.

Скопје | пред 7 месеци

Обвинение за шест полицајци и две лица поради злоупотреби со странци: го кршеле законот за да земат 950 евра мито

Јавен обвинител од Специјализираното одделение за гонење на кривични дела сторени од лица со полициски овластувања и припадници на затворската полиција до Основниот кривичен суд Скопје поднесе обвинителен акт против шест полициски службеници и уште две лица.Од доказите произлегло дека првообвинетиот заедно со две лица, за кои постапката е во прекин, сториле кривично дело „Примање награда за противзаконито влијание“. Со искористување на своето претпоставено влијание врз двајца полицајци, тие влијаеле службените лица да не постапат согласно законот и да му овозможат на турски државјанин, кој незаконски престојувал во земјава, да добие дозвола за привремен престој. За посредувањето била примена награда од 900 евра, а полицајците го прифатиле влијанието и ја злоупотребиле својата службена положба.Еден од обвинетите полицајци, вработен на граничниот премин Долно Блаце, е обвинет и за „Примање поткуп“. Тој од турски државјанин индиректно побарал и примил 3000 денари за да изврши службено дејствие што не смеело да се изврши. Други тројца полицајци и едно лице посредувале во давањето на поткупот, при што со патната исправа на турскиот државјанин извршиле фиктивен влез во земјата, како предуслов за отпочнување постапка за одобрување престој. На сличен начин било овозможено и друг турски државјанин со незаконски престој да ја напушти Македонија без да биде евидентиран во системот и без да му биде наплатена глоба, со што бил оштетен и Буџетот на државата.Дополнително, според обвинението, обвинет виш инспектор за странци и реадмисија од јули минатата година до април оваа година незаконски одобрил престој за седум државјани на Бангладеш и Непал, иако имало негативни известувања од АНБ за безбедносен ризик. Тој, спротивно на Законот за странци, носел решенија со кои на сите им бил одобрен привремен престој за работа.Истражната постапка започна во мај, кога 11 лица беа лишени од слобода, а две беа недостапни на органите на прогонот. Против едно лице подоцна е донесена наредба за запирање на постапката, а за две лица кривичната пријава е отфрлена. Едно од првично недостапните лица е обезбедено и се наоѓа во екстрадиционен притвор во Србија, додека по другото е распишана меѓународна потерница.

Македонија | пред 7 месеци

За тероризам ќе се гони лицето што се закануваше со подметната бомба во авион

Основното јавно обвинителство ГОКК отвори истрага против лице осомничено за кривично дело тероризам, откако на 16 август преку бројот за итни повици 192 упатило лажна закана за поставена бомба во авион на релација Скопје–Анталија.По добиената дојава, веднаш биле активирани антитерористичките протоколи и извршена повеќечасовна проверка, со која било утврдено дека станува збор за лажна пријава. Инцидентот предизвикал чувство на страв кај патниците и сериозно го нарушил воздушниот сообраќај.За обвинетиот е одобрен 30 дневен притвор.

Македонија | пред 7 месеци

Обид за убиство во Скопје: 28-годишна жена се обидела да ја задуши бабата на својот сопруг

Основното јавно обвинителство Скопје поведе истражна постапка против 28-годишна жена осомничена за обид за убиство – кривично дело по член 123 став 2 точка 2 во врска со член 19 од Кривичниот законик.Според обвинителството, на 15 август во домот на улицата „Борис Бојаџиски“ во Скопје, за време на семејно насилство, осомничената се обидела да ја лиши од живот бабата на својот сопруг, родена во 1938 година, со која живееле во семејна заедница.Додека жртвата одмарала во една од собите, осомничената влегла и ја заклучила вратата. Таа седнала врз бабата и ставила перница врз нејзината глава со намера да ја задуши, при што дополнително ја удирала со тупаници по главата. Нападот го прекинала мислејќи дека жртвата е мртва, по што му кажала на сопругот за стореното.Сопругот веднаш ја известил полицијата, а повиканата екипа ја пренела повредената во болница, каде биле констатирани нагмечувања на главата и вилицата, како и повеќе хематоми.Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничената. Од Обвинителството велат дека постојат очигледни околности кои укажуваат на опасност таа да го повтори делото или да го доврши започнатиот обид за убиство.

Скопје | пред 7 месеци