СО

Коцевски засега „сигурен“, Влада држи кочница и го чека да се „докаже“

Останува паузирано разрешувањето на јавниот обвинител Љупчо Коцески, од кого Владата беше незадоволна и за што отпочна постапка, па ја стопираше по пожарот во „Пулс“. Премиерот Христијан Мицкоски кажа дека Владата го кажала ставот, а тоа беше дека нема да продолжат со разрешувањето за да не прават проблеми во истрагата и нејзниот тек.„Став Владата имаше по тоа прашање, бидејќи веќе тоа прашање беше поставено. Немам ништо различно од тој став“, рече Мицкоски.„Скопје1“ утринава побара и став од Владата, кои велат дека иницијативата не е повлечена, но оставаат Коцевски да се докаже во својата заложба за непристрасно гонење.„Иницијативата за разрешување не е повлечена, но ова е период каде Коцевски може да ја докаже својата заложба за непристрасно работење преку борба против криминалот за повеќе случаи“, рече владината портпаролка Марија Митева за „Скопје1“.Дел од медиумите известија дека за една недела ќе продолжи разрешувањето на Коцевски, информација која не ја потврдуваат, ниту негираат од Владата. Постапката застана откако Владата доби мислење од Советот на јавни обвинители кои застанаа во одбрана на Коцевски. Тоа мислење, треба да се испрати до Собранието за процесот да продолжи.

Македонија | пред 9 месеци

Џолев доби унапредување – од шеф на Кривичен, во судија на Апелација

Судскиот совет на денешната седница донесе одлука Иван Џолев, досегашен претседател на Основниот кривичен суд Скопје, да биде избран за судија во Апелациониот суд Скопје – кривичен оддел.Со овој избор, Џолев преминува во втората судска инстанца по долги години минати во Кривичниот суд, каде што ја изгради својата професионална кариера. Тој беше именуван за претседател на Кривичниот суд Скопје во 2017 година, во период кога се најавуваа реформи во правосудството, по смената на дотогашниот претседател Владимир Панчевски, кој подоцна беше и осуден за злоупотреба на системот за распределба на предмети (АКМИС).За време на својот мандат, Џолев ја водеше институцијата низ низа чувствителни и медиумски експонирани процеси, вклучувајќи предмети од СЈО, високи профилирани политички случаи и случаи поврзани со организиран криминал.Неговиот избор во Апелација се толкува како професионален напредок, но и како значајно кадровско поместување во контекст на тековните реформи во судството.

Македонија | пред 10 месеци

Смена на врвот: Судскиот совет не ја избра Адеми, Фидани поставен за шеф на Врховниот суд

Со 8 гласа „за“ и 5 „против“, Судскиот совет денеска го избра судијата Африм Фидани за нов претседател на Врховниот суд. Неговата противкандидатка, судијката Беса Адеми, која ја вршеше функцијата до февруари годинава, доби само 2 гласа „за“ и 11 „против“, што не беше доволно за повторен мандат.На истата седница, Советот треба да избере и 10 нови судии за Апелациониот суд Скопје.Африм Фидани има долгогодишна кариера во правосудниот и јавниот сектор:1990–1996: работел во просветата на правно-административни позиции.1996–2005: бил републички инспектор за труд во Државниот инспекторат за труд, со фокус на работните односи.2005–2007: ја извршувал функцијата секретар на Општина Врапчиште.2007–2011: работел како адвокат со канцеларија во Гостивар.2011: е избран за судија во Апелациониот суд Скопје, каде работи во кривичниот оддел.Подоцна, со одлука на Судскиот совет, е избран за судија во Врховниот суд на Република Македонија.Сега, со мнозинство гласови, Фидани го презема највисокото место во судскиот систем.Претходно, Беса Адеми, поранешна претседателка на Врховниот суд, беше во центарот на контроверзии поради иницијативата за нејзино разрешување, поднесена од членот на Судскиот совет, Миљазим Мустафа. Мустафа ја обвини Адеми за непочитување на обврските како член по функција во Судскиот совет, наведувајќи дека таа не присуствувала на 21 седница од мај до октомври 2023 година без соодветни оправдувања. Дополнително, интервјуто на Адеми за порталот СДК.мк, во кое зборуваше за политички притисоци врз судството, беше исто така предмет на критика. Адеми и нејзината одбрана ги отфрлија обвинувањата, истакнувајќи дека нејзиното отсуство било оправдано и дека интервјуто претставува израз на слободата на говор. Таа нагласи дека постапката против неа е обид за политички притисок врз судството. Судскиот совет, по разгледување на извештајот од Комисијата, одлучи да ја запре постапката за утврдување на одговорност на Адеми, дозволувајќи ѝ да ја продолжи функцијата како претседателка на Врховниот суд.

Македонија | пред 10 месеци

Ниту еден судија од Велес не прифатил привремено да суди во Кочани, Судскиот совет ја избра Емине Калач

Судијката од Основниот суд Велес, Емине Качал, следните два месеци ќе работи во судот во Кочани, бидејќи таму има недостаток и невозможно е навремено да се носат судските одлуки. Со 11 гласа „за“, Калач времено е испратена да работи во тој суд. Ова доаѓа по големата трагедија и покренувањето на истрагата за пожарот во „Пулс“.Претходно, членот на Судскиот совет, Весна Дамева, кажа дека ниту еден судија од Велес не прифатил, самоволно, да суди во Кочани.„Одржана е вонредна седница на Кривичниот оддел во Велес и сите судии не се согласија да бидат делигирани. Им држат аргументите дека ќе биде нарушена ефикасноста на судот. Секако дека ќе има побавна правда, но за тоа не се виновни ниту Основен Велес, ниту Судски совет, ниту Кочани“, рече членот на Судскиот совет, Весна Дамева.На седницата на Судскиот совет, беше кажано дека веројатно ќе има потреба да се пратат плус двајца судии во Кочани, кога ќе се покрене обвинение.

Македонија | пред 10 месеци

Интегритетот клучен за Стразбур, Ристоска опфатена со предметот за бонусите во СЈО, а комисијата ја предложил министерот чија сопруга е братучедка на кандидатката

Реакции покрена името на Ленче Ристоска, обвинителка за врски со Европравда, а порано дел од тимот на Специјалното јавно обвинителство, кога се најде на листата за судии во Стразбур. Покрај значајните предмети кои ги водела и позитивните критики, се фрла сомнеж на целата постапка поради нејзина далечна, но сепак роднинска врска со сопругата на министерот Тимчо Муцунски. Вклученоста на Муцунски во процесот е само како предлагач на членовите на Комисијата која ги оценува кандидатите, а што Владата ја избира на седница.Истовремено, првиот услов за предлог и избор на судиите во Стразбур е највисок морален углед, а Ристоска е опфатена во предметот за бонусите во СЈО. „Скопје1“ побара став од неа, околу овие прашања, како и тоа кога последен пат работела обвинителски предмет, со оглед на нејзиниот ангажман во Европравда – но не добивме одговор.Да станеш судија во Стразбур, за голем дел од правниците е највисоката функција која би можел да ја добиеш во кариерата. Но, во Стразбур, каде се бира еден од трите предлози кои ќе дојдат, пред сѐ се бара: „Судиите треба да уживаат висок морален углед“. Тоа, меѓу другото би значело личност против која не се водат никакви постапки, која не е инкриминирана во било какви незаконски дејанија, за која нема ниту сомнеж за корупција.За обвинителката Ристоска е познато дека е опфатена во предметот за бонусите кои биле исплаќани во СЈО. За овој случај се бараше и разрешување на републичкиот обвинител, Љупчо Коцевски. „Скопје1“ инсистираше Обвинителството да даде одговор до каде е овој случај и каква одлука е донесена – но залудно. До овој момент, оттаму молк. За него се покрена и „војна“ помеѓу обвинители, откако Вишото обвинителство побара предметот да се реотвори, а републичкиот обвинител Љупчо Коцевски ја сметаше ваквата одлука за незаконска. Ја прашавме и Ристоска, дали тоа што е опфатена во овој предмет, придонесува кон тоа да ѝ е нарушен моралниот углед – но до овој момент не добивме одговор.Потоа, успеавме да ја потврдиме информацијата дека Ристоска е во роднинска врска со Симона Муцунска, сопруга на Тимчо Муцунски. Ова ни го потврдија и од Министерството за надворешни работи, од каде велат дека: „не се блиски роднини“. Сепак, токму МНР предлага членови на Комисијата до Влада, а истата е составена од претставници на министерството, Врховен и Уставен суд, Судски совет, Совет на јавни обвинители, Министерство за правда, универзитети. Владата има улога на одобрувач на предложениот состав, што ѝ го сторила. Ристоска не одговори на прашањето дали Муцунски имале удел во тоа предлогот со нејзино име за судија да допатува до Влада. Истовремено, МНР велат дека нема конфликт на интереси.„Во однос на прашањето за роднинската поврзаност на сопругата на министерот со еден од кандидатите, посочуваме дека станува збор за сродство од четврти степен по странична линија – однос кој, согласно позитивната законска регулатива, пред сè во контекст на Законот за спречување на корупцијата и судирот на интереси, не се смета за правно релевантен. Таквиот степен на сродство не создава обврска за изземање, не се пријавува како близок роднински однос и не претставува основ за преземање мерки за заштита од потенцијален судир на интереси. Министерот ниту има надлежност, ниту влијание врз процесот. Во конкретниот случај не постои основ за изземање, ниту за пријава на судир на интереси, ниту пак, постои ризик од нарушување на принципите на објективност и непристрасност“, велат од МНР.Сепак, за Европскиот суд за човекови права, доволно е да постои легитимен сомнеж дека судот не е непристрасен, за да утврди повреда на правото заштитено со Конвенцијата. Таму постои т.н. објективен и субјективен тест. Во случајот, Комисијата на МНР (орган кој заседава за апликантите) не го применува објективниот тест, поради сомнеж дека на листата селектира апликант кој е роднински поврзан со блиско лице на министерот. Тука е од второстепено значење, во кој степен се тие роднини. Во еден од стандардите на Европскиот суд за човекови права се содржи и т.н. објективен и субјективен тест, при што објективниот тест педвидува,  „трибуналот“ да биде составен од независни и непристрасни судии, но се осврнува и на перцепцијата на разумен набљудувач, кој треба да создаде слика дека „трибуналот“ е независен.Од МНР не добивме одговор на прашањето во однос на тоа дали според нив, обвинителката Ристоска го исполнува условот на Стразбур да ужива висок морален интегритет.Ристоска е обвинителката која го водеше еден од најголемите и најтешки случаи во Македонија, „Таргет-тврдина“, за прислушувањето, против Сашо Мијалков. Но и „Талир“ против челници на ВМРО-ДПМНЕ за незаконско финансирање на партијата, каде им го замрзна имотот. Сегашниот премиер, а тогаш само претседател на ВМРО-ДПМНЕ рече бил и уценуван со одмрзнувањето на имотот со продолжување на мандатот на СЈО. Истовремено, од обвинителката кандидат за во Стразбур не добивме одговор, дали тој интегритет е компромитиран поради случајот „Талир“ и начинот на распит на сведоците кој се коментираше во јавност.Пред девет години, Стразбур ја врати листата и не избра ниту еден од предложените кандидати за судии – што претставува и срам за државата. Ова не е единствен ваков случај. Во 2018 година, поради родниниски односи со премиерот Еди Рама, Стразбур не прифати да го избере Даиран Павли за судија. Во 2021 година, таков случај имаше Украина, чии кандидати беа одбиени поради сомнителен морален интегритет.Предлогот со името на Ристоска, но и судијката Габриела Гајдова и адвокатот Јордан Апостолски, треба да се најде на владина седница. Членовите ќе одлучуваат, по што листата ја доставуваат во Стразбур, а таму, конечната одлука ја носи Парламентарното собрание на Советот на Европа со мнозинство гласови.

Македонија | пред 10 месеци

Осудениот врховен судија Георгиев се вработи како магационер: сега излегува денски, навечер се враќа во затворот

Осудениот поранешен врховен судија, Наќе Георгиев, кој е осуден за земање на мито, сега се вработи како магационер, дознава „Скопје1“. Ова пак, му овозможува денот да го поминува излезен од зад решетките, но треба да се враќа таму и да преспива. Погодноста му е овозможена бидејќи тој издржа нешто повеќе една година од тригодишната затворска казна. Од затворот „Скопје“, беше префрлен во струмичкиот затвор.„Осуденикот редовно користи погодности, викенд од три дена, излез од седум часа. Од денес е работно ангажиран во приватна фирма, со дадена согласност од директорот на Управата за извршување санкции“, вели директорот на затворот, Зоран Ристов за „Скопје1“.Но, и изминатата година, тој користел поволности. Според информациите на „Скопје1“, Георгиев излегувал на викенди, кои му се давани согласно правилникот на затворот. Сите привилегии ги уживал, благодарение на доброто поведение.Инаку, Георгиев се спогоди со Обвинителството за гонење организиран криминал и корупција по случајот за земање мито од синот на ексградончалникот на Ново Село, Боро Стојчев и прифати да му биде изречена казна затвор во траење од три години, како и Забрана за вршење професија, дејност или должност на службено лице во период од три години.

Македонија | пред 10 месеци

(Видео) Не може да зборуваме за независно судство, кога финансирањето е преку Владата, смета Камбовски, претседател на Судски совет

Александар Камбовски, претседател на Судскиот совет, смета дека не може да се зборува за независно судство, ако се уште финансирањето оди преку извршната власт односно Владата. Според него, тоа е основата, бидејќи судовите не се само зградите, туку тие треба да се опремени, а работи персонал кој опслужува и треба да биде платен.„Моментално се соочуваме со катастрофален недостиг на кадри. И судиите, кои што се, прават вонредни напори да бидат ефикасни“, рече Камбвоски.

Македонија | пред 11 месец

(Видео) Сѐ помалку судии и службеници, сѐ повеќе предмети - првиот човек на Кривичен тука го гледа проблемот со ефикасноста на судот

Претседателот на Здружението на судии и на Кривичниот суд, Иван Џолев, се пожали дека бројот на предмети кои доаѓаат е се поголем, но помал е бројот на човечки ресурси. Тој рече дека се кратат пари од судството, за да се вложат во други сектори како што е образованието. И затоа, ефикасноста е слабата страна, а тоа би значело дека предмети се судат со години.„Ефикасноста во моментов е проблем, меѓутоа не толку голем. Ефикасноста ја генерираат други структури. Недостаток на судии, судски служби, финансиската независност ствараат проблеми во смисла на кадровски решенија. Ние секоја година имаме се поголем број на предмети, а помал број на судии. Ако сакаме ефикасно судство мора да се инвестира“, рече Џолев и додаде:„Ако сакате да имате ефикасно судство, ако имате зголемен број на судски предмети, а што упатува на тоа дека државата има ефикасни системи, мора да обезбедите опрема, човечки и материјални ресурси“.

Македонија | пред 11 месец

Пајазит Пајазити останува судија, казнет само 30% од плата за тоа што го пушти Блерим Рамадани од притвор, па тој избега

Пајазит Пајазити, останува судија во Кривичниот суд, и покрај одлуката да го пушти Блерим Рамадани од УЧК од ефективен во домашен притвор, по што тој избега. Ова е конечната одлука на Судскиот соввет, донесена во петокот на затворена седница, пишува „Алфа“. Пајазити доби само парична казна, шест месеци да зема 30% помала плата. Останува правораздавач во одделението за претходна постапка, кое одлучува по притвори за осомничени. Одлуката за Пајазити е донесена осум месеци откако Рамадани избега, а откако за целата стручна јавност беше чудно - како ова лице се пушта во домашен притвор во земја во која не е резидент.Уапсениот Рамадани, на 18 јули минатата година се согласил пред судијата Пајазити да биде екстрадиран по скратена постапка во Србија и се согласил да биде суден. Пајазити тогаш му определил притвор. Но, на 22 јули, Рамадани поднел жалба преку својот адвокат во кој навел дека не го разбрал преведувачот кога зборувал за скратената постапка за екстрадиција. Според Законот за меѓународна соработка, изјава за скратена постапка за екстрадиција е неотповиклива и не може да биде повлечена, што би значело дека Рамадани не можел да се предомисли.Сепак, судијата Пајазити ја прифатил новата одлука на Рамадани. По ова, иако опстојувале сите причини кои укажувале на бегство, односно околностите биле целосно непроменети, Пајазити одредил куќен притвор за Рамадани, кој избега. И официјален Белград побара одговори од државните органи како Рамадани баран преку Интерпол од куќен успеа да избега за Косово.Пајазити има и други дискутабилни пресуди. Тој е судијата на претходна постапка кој не одреди притвор за групата која упадна во М-НАВ предводена од Беким Незири. Тој е заменик претседател на Кривичниот суд а во времето кога Груевски беше во бегство беше судија за санкции кој ја носеше одлуката за издрживање на казната затвор. Судскиот совет одлучи тогаш дека нема пропуст кај судијата Пајазити кој му даде покана за затвор на Груевски.„Скопје1“ во детали објасни како избега Блерим Рамадани:

Македонија | пред 11 месец

Судијата Ељведин Ферати преполагал за да му ги пречкртаат оценките и заменат со нови - Обвинителството нема да го гони

Обвинителството нема да го гони судијата Ељведин Ферати од Тетово, оти обвинителите утврдиле дека оценките биле пречкртани бидејќи тој ги преполагал предметите. Откако добил повисоки оценки, можел и да се пријави на Академијата за судии и јавни обвинители. Поради ова, Обвинителството констатира дека Ферати не сторил никакво прекршување на закон.„По поднесено известување од Државниот просветен инспекторат, Основното јавно обвинителство Скопје оформи предмет и ја прибави целокупната документација од досието на наведениот студент од Правниот факултет при Државниот универзитет во Тетово и од Академијата за судии и јавни обвинители „Павел Шатев“. Во прилог на досието беа доставени и материјални докази - барања, решенија и пријави за повторно полагање, како и доказ за добиени оценки за четири предмети со кои Факултетот потврдува дека во 2014 година студентот ги преполагал испитите и добил оценки со кои го зголемил својот просек над 8,00, по што се пријавил за кандидат на Академијата за судии и јавни обвинители. Ваквата информација на 31.01.2024 година Државниот универзитет во Тетово ја доставил и до Државниот просветен инспекторат, како дополнување на списите врз основа на кои бил изготвен Записникот за извршен инспекциски надзор во јуни 2023 годинаИмајќи ги предвид доставените документи, јавниот обвинител кој постапуваше во предметот на 10.03.2025 година донесе резолуција со која констатираше дека не се исполнети елементите врз основа на кои би можел да преземе кривичен прогон по службена должност“, велат од Обвинителството за „Скопје1“.Судијата Ферати дипломирал како дел од шестата генерација слушатели на Академијата за судии и јавни обвинители. Тој, се пријавил дека има оценка 8,20, додека во дипломата за завршени студии по право на Тетовскиот универзитет, имал просек 7,88. Ова го утврди и соопшти Антикорупциска во декември 2023 година.Тогаш беше посочено дека кога Државниот инспекторат влегол во Тетовскиот универзитет, во матичната книга, кај Ферати имало поправено три оценки со пречкетување, а истите биле поправени со повисоки.По ова, во септември минатата година беше отворена предистрага. Скопското Обвинителство за „СДК“ тогаш изјави дека постапува и презема дејствија за да ги испита овие тврдења.

Македонија | пред 11 месец

Џемали Саити-в.д. претседател на Врховен суд

Судскиот совет на денешната седница со 10 гласа „за“ и два „против“ го назначи судијата Џемали Саити за в.д. претседател на Врховниот суд.На ова место ќе биде од 13 март до изборот на новиот претседател.Ханиф Зендели го предложи Саити за в.д. претседател на Врховниот суд затоа што актуелната претседателка Беса Адеми, чиј мандат завршува за два дена и Ариф Фидани се кандидати за претседатели на овој Суд. Според него тие не треба да бидат именувани за вршители на должност за да не се сфати дека некој од нив се фаворизира во понатамошниот тек од постапката.Претседателот на Судски совет Александар Камбовски за в.д. ја предложи актуелната претседателка на Врховниот суд бидејќи според него таа добро ја извршувала функцијата и треба да продолжи до изборот на нов претседател.

Македонија | пред 1 година

Утре Советот ќе бира 47 обвинители

Советот на јавни обвинители на утрешната седница ќе избира четириесет и седум обвинители во осумнаесет јавни обвинителства.14 јавни обвинители, треба да се изберат во Основното јавно обвинителство Скопје.Во Основните јавни обвинителства во Велес, Делчево, Кочани, Крива Паланка, Радовиш, Ресен и Струга ќе се избира по еден јавен обвинител.По двајца јавни обвинители ќе се избираат во Основните јавни обвинителства во Битола, Гевгелија, Гостивар, Кичево и Струмица.Во Основните јавни обвинителства во Куманово, Охрид, Прилеп и Штип ќе се избираат по тројца јавни обвинители.Во Основното јавно обвинителство Тетово треба да бидат избрани четворица обвинители.Новите обвинители ја завршија Академијата за судии и обвинители и треба да го ублажи недостатокот од јавни обвинители во целата држава.

Македонија | пред 1 година

(Фото) Обвинителството не можело да го најде Хајрулахи, а тој истовремено им поднесува кривична пријава

Истрагата против суспендираниот шеф на вишото обвинителство, Мустафа Хајрулахи се ближи кон крајот, се пофали Основното обвинителство во Штип. За кривичната пријава која е поднесена против обвинителката која ја води истрагата, велат дека е притисок. Содржината не ја коментираат, со тврдење дека пријавата не е примена.„До овој момент таква пријава не е примена. Доколку биде, истата ќе биде распоредена кај надлежен јавен обвинител. Основното јавно обвинителство Штип ја известува јавноста дека во постапката против осомничениот се постапува целосно согласно закон, а истрагата е во финална фаза. Надлежниот јавен обвинител не подлегнува на притисоци и испрати покана до осомничениот тој да даде исказ во своја одбрана, меѓутоа поканата е вратена со забелешка дека тој се иселил од адресата наведена за лицето во полномошното и во системот на МВР“, велат од Основното јавно обвинителство Штип.Како ретко кога, штипското основно обвинителство ја сподели и поканата која што Хајрулахи не ја примил.„Поради интересот на јавноста, Основното јавно обвинителство Штип ја објавува потврдата од неуспешната достава на покана за распит за г-динот Хајрулахи.  Заради заштита на личните податоци адресата е прикриена и е истата официјална адреса на конкретното лице“, додадоа од Обвинитлството.Ова е ретка пракса, Обвинителство да испраќа материјали за да се докажува околу достава до обвинет. Најчесто, кога се бараат информации, обвинителствата не ги даваат во целост под изговор дека кога предметите се во истрага, таа е тајна.

Македонија | пред 1 година

Хајрулахи започна прогон на четири обвинители: тврди дека му отвориле предмет без докази, само за да го тргнат од работно место

Суспендираниот шеф на Вишото јавно обвинителство-Скопје, поднел кривична пријава против четири негови колеги, меѓу кои е и неговиот шеф, државниот обвинител Љупчо Коцевски.„Ве информирам дека денеска поднесов кривична пријава против Љупчо Коцевски, јавен обвинител на Република Северна Македонија, Татјана Кацарова, јавен обвинител во ОЈО Штип, Ристо Бојаџиски, Виш ЈО на ВЈО Штип и Ермон Незири, член во Совет на јавни обвинители за сторено кривично дело Злоупотреба на службена положба и овластување по чл. 353 од Кривичниот законик“, вели Хајрулахи во дописот.Кривичната пријава е поради предметот кој беше отворен против него. Хајрулахи го отвора прашањето кои истражни дејствија ги презела обвинителката Татјана Кацарова која го гони, за да утврди дека има основано сомнение, тој да е сторител на кривично дело. Според него, наредбата за истражна постапка, без никакво преземено дејствие за да се поткрепи кривичната пријава, била доставена до државниот обвинител Коцевски, само за да му послужи како аргумент за оддалечување на Хајрулахи од работното место.

Македонија | пред 1 година

Љупчо Коцевски ситно брои до заминувањето, побавна е постапката за избор на нов државен обвинител

Владата одлучи, Љупчо Коцевски не ги задоволи критериумите за ефикасно обвинителство, направи процедурални пропусти и затоа на брза лента ја води постапката за негово разрешување. Иако некои познавачи на материјата не се убедени во законитоста на постапката бидејќи сметаат дека не се исполнети ниту еден од условите за предвремено разрешување на Коцевски, (не е член на политичка партија и не е јасен критериумот по кој ќе се оцени дека направил тежок прекршок), никој веќе не верува дека Коцевски може да се спаси. Доколку не му се покрене и дисциплинска постапка за разрешуавње, се уште актуелниот државен обвинител може да ќари плус три години да правораздава, наместо да се пензионира. Летото минатата година тој наполни 64 години што значи може уште две и пол години да остане во ЈОРМ и да ја чека пензијата.Владата го повикуваше да даде сам оставка Коцевски засега не покажува желба да го стори тоа и упорно чека да му се докаже тешка повреда во работењето.Иако измените во Законот донесени во 2020 година требаше да бидат брана и да сопрат разрешување на државниот обвинител со промена на власта сепак се покажа дека законските одредби не се до крај прецизни, бидејќи побрзо и поедноставно е да разрешите отколку да изберете нов државен обвинител.Членовите од Законот за Јавното обвинителство покажуваат дека Коцевски ќе биде разрешен релативно брзо од страна на Собранието а по предлог од Владата. За избор на наследник на Коцевски задолжително е позитивно мислење за еден од кандидатите што ќе се јават на оглас, кое го дава Советот за јавни обвинители. Ваквото мислење не е обврзувачко кога се прави разрешување. Законодавецот предвидел и изборот и разрешувањето да бидат со исто мнозинство, позитивен глас од 61 пратеник.Во образложението на Министерството за правда зошто е потребно разрешување на Коцевски стои:„Во изминатиот период бевме сведоци на низа скандали, нарушена функционалност на Јавното обвинителство, нарушени меѓучовечки односи, незаконски постапувања и корупција, неефикасност во кривичното гонење и повреда на принципите на организација на Јавното обвинителство и самостојноста во вршењето на функциите на обвинителите во Вишото јавно обвинителство. Државниот јавен обвинител на Република Северна Македонија постапувал во предмети во кои согласно законските одредби постоеле околности кои предизвикуваат сомневање во неговата непристрасност, како и судир на интереси, а за кои околности тој требало да знае и требало да се изземе. Воедно, во јавноста беа лиферувани и информации и податоци за предмети, со што е повредена обврската за тајност во постапките“.Владата предлогот за разрешување на Јавниот обвините треба да го разгледа на утрешната седница и да го достави до Советот на јавни обвинители кој е должен во рок од 15 дена од денот на приемот на предлогот, до Владата да достави образложено позитивно или негативно мислење во писмена форма.Ако Советот на јавни обвинители од оправдани причини во определениот рок не достави мислење до Владата , рокот од 15 дена се продолжува за уште 15 дена. Ако и во овој рок Советот на јавни обвинители не достави мислење, се смета дека не го поддржува предлогот на Владата. Но ова не менува ништо и предлогот за разрешување и со негативно мислење и без мислење патува до Законодавниот дом, каде владеачкото мнозинство е комотно во одлучувањето.За наследникот на Коцевски може постапката да се проблематизира бидејќи според законот задолжително е позитивно мислење на Советот на јавни обвинители за личноста или личностите кои се јавиле на огласот и ги исполнуваат условите. Владата од предложените кандидати од Советот се определува за еден кандидат кој го бираат пратениците со минимум квалификувано мнозинство.Државниот обвинител со задолително 10 годишно искуство доаѓа од редовите на обвинителите и судиите.

Македонија | пред 1 година

„Процедурата е тргната, нема застанување. Ќе го поминеме тоа“, вели Мицкоски за разрешувањето на Коцески

Конечниот предлог за разрешување на државниот обвинтиел Љупчо Коцевски, сосе процедура, ќе се разгледува и гласа на следната владина седница која е закажана во вторник, односно за два дена. Тој најави дека процесот нема да застане, туку ќе заврши.„Процедурата е тргната, нема застанување. Ќе го поминеме тоа“, рече Мицкоски.Тој додаде дека следен процес се интерпелациите во Судскиот совет.„Тие два процеси не се во колизија, следно е Судски совет“, додаде Мицкоски.

Македонија | пред 1 година

„Покрај правна, подлежи и на општествена одговороност“ - Правда ќе достави предлог, Советот ќе даде мислење за разрешувањето на Коцевски

Владата го разгледа мислењето од Министерството за правда, па го задолжи да достави предлог за разрешување на јавниот обвинител кое Владата ќе го достави до Советот на јавните обвинители. Портпаролката Марија Митева информираше за причините.„Како Влада сакаме да ја информираме јавноста дека на денешната седница, беше разгледано мислењето од Министерство за правда по кое владата отвори сериозна дискусија. Постапувајќи по заклучокот кој беше донесен на претходната владина седница со која го задолживме Министерството за правда да преземе активностите во однос на поведување на постапка за разрешување на Јавниот обвинител, Министерство за правда го достави мислење во кое се нотирани следниве состојби:Како прво: нарушениот углед на институцијата со која раководи јавниот обвинител, затоа што чувањето на угледот на институцијата е должност која потекнува од Законот за јавно обвинителство, конкретно член 4 став 1. Понатаму, целокупната јавност во изминатиов период беше сведок на низа скандали, нарушена функционалност на ЈО, незаконски постапувања и корупција, неефикасност и повреда на принципите и самостојноста во вршењето на функциите на обвинителите. Ваквите состојби се комплетно спротивни на обврските кои произлегуваат од законските надлежности.Овде не станува збор само за перцепција само на Владата, ова е констатирано од стручна јавност, констатирано е во извештаи кои имаат конкретни, мерливи и објективни показатели. Во оваа смисла, Владата цени дека придонесот од јавниот обвинител за овие состојби е значителен и е резултат на низа пропусти и повреди во неговото постапување и извршување на функцијата. Овие дејствија со кои се предизвикани тешки последици по функционирањето на јавното обвинителство со што е направено намерно и неоправдана крупна професионална грешка се правните аргументи со кои што ќе побараме разрешување на Јавниот обвинител пред истекот на мандатот. Дополнително како Влада цениме дека јавниот обвинител покрај правна одговорност, подлежи или би требало да подлежи и на поширока општествена одговорност, особено пред органот кој што го избрал, а пред се пред граѓаните чии интереси треба да ги штити. Согласно вака утврденото мислење, Владата го задолжи Министерството за правда да достави предлог за разрешување на јавниот обвинител, кое пак Владата ќе го достави до Советот на јавните обвинители од каде согласно законските одредби потребно е да се добие мислење“, рече Митева.

Македонија | пред 1 година

Се собирале докази против Хајрулахи во Обвинителство, додека во Владата се изјаснува за разрешувањето на Коцевски

Денот кога Владата се изјаснува за предлогот за разрешување на Љупчо Коцевски од позицијата државен обвинител, во Вишото јавно обвинителство-Скопје дошла обвинителката од Штип да обезбедува докази против суспендираниот Мустафа Хајрулахи. Обвинителството посочува дека штипската обвинителка вршела увид во документација, за да докажува дека Хајрулахи вршел Злоупотреба на службената положба и овластување и Малтретирање во вршење на службата поведена против јавен обвинител.“Јавниот обвинител и стручни соработници од ОЈО Штип ги документираа податоците внесени во уписниците и начинот на внесување на предметите. Притоа, се вршеше и споредба со исказите на оштетените лица – пријавители за начинот на кој наведуваат дека се интервенирало при распоредување на предметите. Увидот во документацијата е извршен во целост во согласност со одредбите на Законот за кривична постапка и за истиот ќе биде изготвен записник со констатации за сите присутни лица“, велат од Обвинителството.Постапката против Хајрулахи беше отворена откако Коцевски му покрена дисциплинска постапка, а четири вработени му поднесоа кривична пријава. Хајрулахи и јавно сведочеше дека Коцевски му кажувал како да постапи со предметот поврзан со „Бонусите на СЈО“, но и дека го условувал со постапка против нег доколку не постапи така.

Македонија | пред 1 година

По седум дена обвинителката Цалева сфатила дека нема искуство да раководи со Вишото обвинителство-Скопје

Обвинителката Наташа Крстевска Цалева се повлекла од раководната функција во Вишото јавно обвинителство бидејќи сметала дека нема доволно искуство, дознава „Скопје1“. Таа до Советот на јавни обвинители испратила писмо насловено како „молба“, за да биде тргната од функцијата по само седум дена откако беше назначена. Таа беше предлог на републичкиот јавен обвинител Љупчо Коцевски, за кого во тек е постапка за разрешување.„Скопје1“ побара став од Советот на јавни обвинител. Претседателката Душица Димитриеска посочи дека го добила писмото и дека на денешната седница ќе ги запознае останатите членови со неговата содржина. Посочи дека дневниот ред за оваа седница е утврден од пред една недела, па затоа, не е сигурна дека по барањето ќе може да се одлучува денеска.Изборот на Крстевска-Цалева беше проследен со различни коментари. Владата тврди дека ова е незаконско.Таа не ги издржа критиките и поднесе оставка. Коцевски поведе дисциплинска и поведе постапка против досега првиот човек на ова обвинителство, Мустафа Хајрулахи, заради наводен мобинг кон свои колеги. Хајрулахи во јавни настспи тврди дека е жртва на притисок. Оддалечен од функцијата, на предлог на Коцевски е и досегашниот заменик Јове Цветановски.

Македонија | пред 1 година

(Видео) Коцевски изненаден оти обвинителката која ја предложи за шефица се повлече по седум дена

Републичкиот обвинител кој е на пат да биде разрешен, Љупчо Коцевски не знаел дека Наташа Крстевска Цалева ќе поднесе барање да биде тргната од раководната функција која ја доби во Вишото обвинителство.„Сега дознав од претседателката на Советот на јавни обвинители. Мене не ми кажала ништо (за притисоци), не знам кои се евентуално вистинските причини, дали е ова што денеска стоеше во барањето со оглед дека има само една реченица“, рече Коцевски.„Поради нарушените меѓуљудски односи, ценев дека најцелисходно е истата ги врши одредените работи во Вишото јавно обвинителство-Скопје. Тоа не е в.д. туку обвинител кој ќе потпишува пошта, ќе распределува и ќе врши тековни работи. Следи извештај, завршна сметка. Мора некој јавен обивнител да врши определени работи. Целта ми беше тие меѓуљудски односи да се ускладат“, додаде Коцевски.

Македонија | пред 1 година

Судиите и обвинителите можат да правораздаваат до 67 години, шефот Коцевски и при разрешување ќе може да си остане на работа

Обвинителите и судиите можат да бидат дел од правосудниот систем до 67 години. Ова значи дека по исполнување на старосната граница за пензионирање, тие можат да одлучат да останат дел од правосудниот систем. Вакви измени вчера изгласаа пратениците во Собранието. Сега, со писмена изјава, судија или обвинител, може да продолжи да ја обавува функцијата.„По исклучок од член 104 од овој закон, лице кое остварува права од работен однос врз основа на одлука за избор или именување од надлежен орган, во согласност со законот што ги утврдува неговите права и обврски кои произлегуваат од вршењето на функцијата, има право да побара да продолжи со вршење на функцијата и по исполнување на условите за старосна пензија, а најмногу до 67 години возраст, со писмена изјава до органот кој го избрал или именувал. (2) Писмената изјава од ставот (1) на овој член, лицето ја дава еднаш годишно, а најдоцна до 31 август во тековната година за продолжување на вршењето на функцијата за наредната година“, стои во измените на Законот за работен однос.Ова значи дека и обвинителот републичкиот обвинител Љупчо Коцевски, кој во август полни 64 години и треба да се пензионира, сега е „спасен“. За него во тек е постапка за разрешување од шефовското место, која дури и да заврши со успех, тој ќе остане обвинител. Коцевски ќе треба само да поднесе изјава дека сака да продолжи да ја врши функцијата, а со тоа ќе остане во Републичкото јавно обвинителство.Во образложението од 15-те пратеници, стои дека измените на Законот ги поднесуваат поради нискиот број на судии и обвинители.  Имајќи во предвид дека состојбата во правосудството од аспект на кадровската екипираност е алармантна, а последиците се на штета на граѓаните и ова претставува еден од факторите кои влијаат врз ефикасноста, квалитетот и пристапот до правда, потребно е изнаоѓање на побрзо решение за да се надмине овој горлив проблем. Начин на кој овие проблеми би можеле да се надминат во што е можно пократок рок е да се даде можност за продолжување на судската и јавно-обвинителската функција и по исполнување на утврдената старосна пензија, односно до 67 години возраст, за што постои и законски основ во посебните закони кои ја регулираат оваа област“, стои во образложението на изгласаниот закон.

Македонија | пред 1 година

Крстевска Цалева времено на местото на Хајрулахи

Наташа Крстевска Цалева ќе ракободи со скопското Вишо јавно обвинителство.Таа доаѓа времено на ова место поради суспензијата на досегашниот шеф Мустафа Хајрулахи.Тој беше суспендиран и одалечен од вршењето на функцијата заради кривична пријава за малтретирање на свои колеги обвинители со што се отвори војна на релацијата Коцевски- Хајрулахи.Крстевска Цалева дојде какл предлог на државниот обвинител Љупчо Коцевски, со едногласна поддршка од членовите на Советот на јавни обвинители.По завршувањето на дисциплинската постапка против Хајрулахи ќе се знае епилогот, дали ќе се оди на избор на нов шеф на скопското Вишо обвинителство или Хајрулахи ќе се врати.Во предлогот за Крстевска Цалева стои дека е обвинител со интегритет, без забелешки на нејзината работа, а била и неодамна избрана да работи во Вишото обвинителство.Дисциплинската против Хајрулахи трае.Комисијата за утврдување негова одговорност утврдила неправилности во заведување на предметите во обвинителството. Хајрулахи пак се пожали на притисоци од државниот обвинител Коцевски поради предметот со бонусите на СЈО.

Македонија | пред 1 година

Владата се реши за разрешување на републичкиот обвинител Љупчо Коцевски

Владата го задолжи Министерството за правда да преземе активности за поведување на постапка за разрешување на државниот јавен обвинител.„Разочарувањето на Владата за постапувањето надвор од законските надлежности, разочараноста на граѓаните од системот кој не функционира, резултира со нарушена доверба и нефункционирањето на правната држава“, рече портпаролката на Владата, Марија Митева.Таа образложи и аргументи за разрешувањето.„Се отвори расправата за последниот индекс на транспарентност, од каде можеше да се види дека четири точки се однесуваат на состојбите во Обвинителството и судството. Дополнително, последното именување за в.д. шеф на Вишо јавно обвинителство е одлука која е незаконска“, рече Митева.

Македонија | пред 1 година

Коцевски за Владата откако „тргна возот“ за разрешување: Ги немате сите точни информации!

Републичкиот јавен обвинител, Љупчо Коцевски, за кого Владата донесе одлука за поведување на инцијатива за разрешување тврди дека не работел незаконски. Тој на Владата и посочува дека донела грешна одлука водејќи се од неточни информации.„Од она што имав прилика да го прочитам по медиумите, причина за одлуката на Владата била тоа што изборот на раководител на Вишото јавно обвинителство Скопје бил наводно незаконски. Верувам дека Владата ги немала на располагање сите релевантни и точни информации и заради избегнување на недоразбирања, сакам да го појаснам следното: Распоредот за работа на Вишото јавно обвинителство Скопје, донесен од обвинителот Хајрулахи, кој во моментов е суспендиран, беше со важност до 31.12.2024 година. Согласно тој распоред лицата определени за негови заменици го имаа статусот на заменик до истекот на распоредот на 31.12.2024 година. Распоредот за работа на Вишото јавно обвинителство Скопје за 2025 година е донесен од обвинителот Цветановски во јануари 2025, во момент кога истиот немал својство ниту на заменик, ниту на шеф на Вишото јавно обвинителство Скопје, што значи дека ваквиот распоред не е донесен согласно закон и не може да произведува правно дејство. Со потврдување на одлуката за суспензија и на обвинителот Цветановски, се јави потреба да се определи јавен обвинител кој времено ќе раководи со Вишото јавно обвинителство Скопје.Сакам да укажам дека не е првпат да се постапува на овој начин и приоритет беше во случајот да се определи раководител на Вишото јавно обвинителство Скопје кој ќе биде гарант за непристрасното, професионално и објективно работење на обвинителството до завршување на дисциплинска постапка за обвинителот Хајрулахи. Појаснувам дека не се работи за назначување на вршител на должноста виш јавен обвинител туку за определување на времен раководител на вишото јавно обвинителство Скопје. Според тоа ве верувам дека моето постапување во овој случај, како и во целокупното мое работење е согласно закон, а со цел овозможување на непречено и законито функционирање на јавното обвинителство и заштита на јавниот интерес“, вели Коцевски.

Македонија | пред 1 година

Советот на обвинителите контра Владата, претседателката без одговор дали Коцевски може да се разреши и ако дадат негативно мислење

Душица Димитриеска, претседател на Советот на обвинители,  се спротивстави на Владата, која беше децидна дека назначувањето на обвинител кој ќе го заменува Мустафа Хајрулахи во скопското Јавно обвинителство е незаконска. Според Димитриевска, одлуката е законска.„Беше донесена одлука, следејќи ги состојбите во Вишото јавно обвинителство каде вишиот јавен обвинител е оддалечен од функцијата, советот утврди дека е потребно во ова јавно обвинителство да се назначи обвинител кој ќе раководи со Обвинителството. Таа одлука е едногласна“, рече Димитриевска.Прашана дали имало законска основа за ваква одлука, таа рече: „Да има, мора да има потписник, мора да има јавен обвинител кој ќе го раководи“.„Јас не можам да дадам одговор на тоа прашање, јас тврдам дека нашата одлука е законита. Тоа Обвинителство мора да има јавен обвинител кој ќе раководи. Уште еднаш да напоменам, се работи за јавен обвинител кој ќе раководи додека трае оддалечувањето на јавниот обвинител“, додаде Димитриевска.Прашана да ја објасни процедурата за разрешување на државниот обвинител Љупчо Коцевски, таа им порача на новинарите да си видат во законот, оти таму ја имало. Немаше ни конкретен одговор, дали процедурата продолжува во Собрание и покрај евентуално дадено негативно мислење од Советот на јавни обвинители за разрешување на Коцевски.„Во однос на тоа прашање, сакам да изјавам дека до сега, немаме до Советот никаков предлог добиено. Кога ќе има предлог, ќе се произнесеме. Советот ќе ги испочитува роковите и процедурата“, рече Димитриевска.

Македонија | пред 1 година